Cebu Press Freedom Week saulogon na sab

KARONG Sabado sa gabii ipahigayon usab ang pagpili sa Mr. & Ms. Press Freedom diin ang mga mananaug maoy ‘magmando’ sulod sa usa ka semana nga pagsaulog sa tinuig nga Cebu Press Freedom Week.

Ang nakanindot ning maong pagsaulog mao nga di kompetinsya kon di panaghigalaay ang ipatigbabaw sa atong mga kauban sa buhat sa lainlaing mga media outlets sa mantalaan, radyo ug telebisyon.

Labaw sa tanan, dinhi lang kini mahitabo sa Cebu. Anà! Daghang mga kalihukan ang ipahigayon ning usa ka semana nga pagsaulog.

Dagkong mga kompaniya sama sa Smart Communications, Globe Telecom, San Miguel Corp. ug uban pa ang way tihiktihik nga mohatag sa ilang suporta base sa nilabayng mga pagsaulog.

Sa pagsulat nako niini, wa pa ko makakuha sa listahan sa mga kalihukan pero sama sa nangaging pagsaulog, daghan ang mga kauban sa buhat nga dagko kaayog ngisi inig pauli sa tagsatagsa ka pinuy-anan.

Kinsa bay di malipay nga makadala man og home appliances, gift certificates, salaping Pilipinhon o labing ulahing modelo sa cellphone? Kamo bay makadaug, o, lalim ba? Anà!

• • •

Magpasalamat ko nila ni Jerome Vargas ug Justin Irons sa ABS-CBN nga nangimbitar sa gipahigayon nga press conference alang sa umaabot nga Tawag ng Tanghalan All Star Showdown niadtong niaging semana.

Ganahan gyud unta kong motambong pero ang nakaapan lang kay duna na koy natangduan nga laing kalihukan. Naglisod ko kay sikit kaayo ang duha ka kalihukan mao nga nibalibad na lang gyud ko nila ni Jerome ug Justin.

Ang TnT All Star Showdown himoon sa Lapu-lapu City Hoopsdome karong Sept. 21 diin ang mga mananaug (Noven Belleza ug Janine Berdin) ug mga finalists sa niaging duha na ka tuig mopakita sa ilang abilidad ug mohatag natog ideya kon nganong sila ang gikagubtan ug gikabuangan sa ‘madlang pipol.’

Kon duna moy higayon, kitakits sa Hoopsdome.

• • •

Mga pahalipay sa Star Cinema tungod sa makabungog nga suporta sa mga makisine sa The Hows of Us nga gibidahan nila ni Kathryn Bernardo ug Daniel Padilla.

Sa pagsulat ko niini, gikataho nga niabot nag P500 milyon ang kita sa pelikula sulod sa duha ka semana.

Ang nakaapan lang kay ang direktor niini nga si Cathy Garcia-Molina giingong mopahuway una kay ang iyang pamilya na sab ang iyang hatagan sa iyang pagtagad.

Basin kon sa pila na ka blockbuster movies nga nahimo ni direk Cathy, nireklamo na gyud ang iyang pamilya nga wa na niya maatiman.

Mao nay giingong, bugti sa kalampusan. Paet!

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph