PADAYONG nangandam ug nag-monitor ang Cagayan de Oro City Risk Reduction and Management Department (CDRRMD) human nisulod na ang Bagyong Ompong sa nasud niadtong Huwebes alas 4 sa kaadlawon, Septyembre 13.
Gitakdang mo-landfall ang bagyo sa northern tip sa Cagayan karong buntag Septiyembre 14, ug apektado ang Northern Mindanao diin makasinati sa madag-umon nga kalangitan inubanan sa katag-katag nga pag-ulan.
Matud ni CDRRMD head Allan Porcadilla nga base sa nasabotan atol sa pre-disaster risk assessment meeting nga padayon sila sa pag-monitor ug pagpangandam aron mamahimong luwas ang tanan.
Basi na usab sa Executive Order 66 dili na kinahanglan nga ang mayor pa ang modeklara nga wala’y klase kung ugaling makita nga aduna na’y peligro sa palibot.
“Kung duna galeng mga barangay nga kusog na kaayo ang ulan sa ilaha unya delikado na pwedi gyud nga ang ilang kapitan maka deklarar sa suspensiyon sa klase, ang school head, ang principal,” pahayag ni Porcadilla.
Kung aduna’y mga panginahanglanon ilabi na panahon sa ulan-ulan ug pagbaha pwedi nga motawag sa mga numero 911 alang sa mga Globe user ug 088- 853-9393 alang sa Smart ug PLDT landline nga abli 24 oras.
Nasayran nga nakasinati ang siyudad og pag-ulan-ulan niadtong Huwebes nunot sa pagsulod sa bagyo sa Philippine Area of Responsibility.