ANG Davao City National High School (DCNHS) ug Pablo Lorenzo National High School (PLNHS) maoy abante sa high school boy's division semifinals sa nagapadayong 2nd Philippine Sports Commission (PSC) Volleyball Tournament adlaw’ng Huwebes, Septiyembre 13, sa DCNHS covered court.

Sa pagpangulo ni Leo Aringa sa DCNHS makalaban ang Catalunan Pequeño National High School (CPNHS) samtang PLNHS makontra ang Doña Carmen Denia National High School (DCDNHS) nga magsugod ang semis alas 8 sa buntag.

Ang DCNHS dunay limpyong rekord nga 3-0 sa bracket A aron mosibog sa semis diin uwahi nila gibiktima ang PLNHS 25-14, 25-11, sa final round sa eliminasyon human midaug sa Vicenta Nograles National High School (VNNHS) ug Calinan National High School (CNHS) niadtong Miyerkules.

Una napildi sa DCNHS, gipalukapa sa PLNHS ang CNHS ug VNNHS nga natagak sa torneyo nga gi-organisa sa PSC.

Sa bracket B, wa sab pildi ang DCDNHS sa eliminasyon nga gipangtagak ang Baguio National School of Arts and Trade (BNSAT), F. Bangoy National High School (FBNHS) ug CPNHS.

Samtang nagpabilin buhi ang paglaum sa CPNHS human gipalagpot ang FBNHS ug BNSAT.

Ang uwahing round sa eliminasyon sa high school girls ug elementary boys ug girls divisions ginadula pa sa pagsulat niini nga balita.