LUYO sa abundang naturales rekursos sa Mindanao, anaa gihapon ang ihap sa mga kabataang malnourished, kuwang sa timbang, nagdako nga di paigo ang nutrina ug bitamina sa lawas.
Tungod niini, gibitbit sa Alaska Milk Corporation sa dakbayan sa Davao ang representante sa Food and Nutrition Research Institute of the Philippines (FNRI) aron ipasabot ang maong kahimtang sa mga kabataan sa nasud.
Sa round table discussion uban ang Davao media ug bloggers tali FNRI, gipasabot kung unsa ang dakong tampo sa duha ka grupo aron kinatibuk-ang mapaambit ang kampanya nga maangkon ang himsog ug saktong panglawas.
“We strengthen our nutrition education and made parents involve talaga sa kung ano ang dapat na kainin ng kanilang anak,” ni Josefina Gonzalez, Science Research Specialist II Food and Nutrition Training Unit sa DOST-FNRI, sa diskusyon sa Tiny Kitchen, Septyembre 10.
Sa nutrition situation sa Davao Region nga gipresenta sa FNRI, subay sa 2016 Regional Dissemination Forum, gibutyag ni Gonzales nga sa kabataang nag-edad og 5 hangtod 10 anyos, tulo gikan sa 10 kanila ang underweight o kuwang sa timbang.
Pito sab sa 10 ang “wasted” o niwang nga usa sab ka health problem.
Tulo sab gikan sa 10 ang stunted ug lima ngadto sa 10 ang overweight sa ilang timbang.
“Environment, sanitation can also be a factor na di sapat ang paglaki ng bata. Sa stunted naman, if parents are stunted ganun din ang bata, but that can be prevented,” dugang ni Gonzales.
Atol sa diskusyon, gipresenta sab ni Gonzales ang “Pinggang Pinoy” nga nagpakita sa saktong gidaghanon ug angay nga i-konsyum sa usa ka bata.
Anaa dinhi ang saktong gidaghanon sa kan-on, gulay, karne ug prutas, inubanan sa pag-inum og tubig ug usa ka basong gatas matag adlaw.
Sa maong suliran, gihingusgan sab sa Alaska Milk Corporation ang kampanya nilang Batang Alaska School Milk Program.
Ning bag-o lang, miduaw sila sa mga tunghaan sa Metro Manila aron ipasabot sa mga kabataan, magtutudlo ug ginikanan ang importansiya sa saktong pagkaon sa pagtubo sa usa ka bata.
Gidasig nila ang tanan nga moinum og usa ka basong gatas matag adlaw, inubanan sa healthy lifestyle alang sa himsog nga panglawas.
Alang ni Gonzales gikinahanglan nga mahatagan og pagtagad ang di saktong pagtubo sa usa ka bata, aron malikayan ang unsa mang balatiang mo-develop pag-abot sa panahon.