ANG kaniadtong gikahadlukan tungod sa mistiko nga tradisyon sa pagpanambal, karon gidumog na sa mga turista tungod sa nindot nga mga suroyanan.
Kini ang silingan nga lalawigan sa Sugbo, ang Siquijor.
Nahimutang 128 kilometros gikan sa dakbayan sa Sugbo, mamahimong mubisita sa isla sa pipila ka pamaagi.
Gikan sa Cebu South Bus Terminal, mamahimong musakay og bus padung sa Liloan Port sa lungsod sa Santander diin adunay fascraft nga nagbiyahean padung sa Sibulan, Negros Oriental.
Gikan sa Sibulan, adunay mga jeep ug traysikol nga pwede sakyan padung sa pantalan sa Dumaguete City ug didto musakay na sab og laing fastcraft padung sa Siquijor.
Mamahimo sab nga magbarko gikan sa dakbayan sa Sugbo diretso sa Dumaguete City.
Pipila sa mga sikat suroyanan
1. Mga simbahan ug kombento
Matag lungsod sa Siquijor adunay mga karaan ug makasaysayan nga simbahan, anaa ang Our Lady of Divine Providence sa Maria ug ang Church of St. Francis of Assisi sa lungsod sa Siquijor.
Apan ang labing ilado sa tanan mao ang San Isidro Labrador Parish Church nga nahimutang sa Lazi.
Kini nga simbahan gideklara nga National Historical Landmark sa National Historical Commission of the Philippines niadtong 1978 dungan sa kombento nga nahimutang atbang niini.
Ang Lazi Convent naila sab nga usa sa mga labing dako nga karaan nga kombento sa nasud.
2. Fish spa sa Balete Tree
Sa lungsod gihapon sa Lazi, mamahimong mag-relax ug magpa-fish spa samtang nagpalandong sa 400 anyos nga Balete Tree sa kantidad nga P20.
Aduna sab souvenir shops sa dapit diin makapalit og pasalubong sama sa keychains ug nakalain-laing tradisyonal nga haplas.
3. Cambugahay Falls
Ug ang labing gipanghambog nga suroyanan sa Lazi, mao ang Cambugahay Falls.
Human sa 135 steps gikan sa kalsada, pwede na mulangoy sa bugnaw nga tubig sa tulo ka lebel nga waterfalls.
Alang ngadto sa nangita og adventure, adunay Tarzan Jump diin gikan sa punoan mamahimong mukupot sa pisi sa di pa mulayat sa tubig.
Sa P20 lang, unlimited na ang pag-enjoy sa atraksyon.
Apan kadtong mga di kamao mulangoy, pwede moabang og life jacket sa kantidad nga P100.
4. Salagdoong Beach
Gawas sa mga makasaysayang simbahan, fish spa sa Balete Tree, ug Tarzan Jump sa Cambugahay Falls.
Gipasigarbo sab sa isla ang tin-aw nga dagat sa Salagdoong Beach nga nahimutang sa lungsod sa Maria.
Mamahimong mag-snorkeling sa dagat nga abunda sa corals ug lain-laing klase sa isda. Aduna sab cliff-diving sa dapit nga may gitas-on nga 22 ka tiil ug 30 ka tiil.
Adunay P75 nga entrance fee aron makasud sa beach.
5. Triad Coffee Shop
Kon pang social media nga mga hulagway sa sunset ang gipangita, adtoa ang Triad Coffee Shop sa lungsod sa Larena.
Gikan sa maong dapit makita ang kabukiran ug kadagatan nga bahin sa lungsod.
Pwede sab mu-order og pagkaon, kape, ug desserts samtang nagpaabot sa picture-perfect nga sunset.
Sulit ug di kamahayan ang pagbisita sa isla sa Siquijor. Suroy na!