MANGAYO og P2 nga provisional nga umento sa pletihan sa mga public utility jeepney ang Basak Lapu-Lapu City Jeepney Operators and Drivers Association (Balacjoda) gumikan sa pagmahal na sa mga palaliton ug sunodsunod nga pagsaka sa presyo sa mga produktong petrulyo.
Samtang sugod karong adlawa, mosaka usab og P5 ang pletihan sa Ceres buses nga de aircon nga manukad sa Cebu South Bus Terminal (CSBT) ug magbiyahian sa habagatan sa lalawigan sa Sugbo.
Gipasabot ni Rodney Santarin, operational manager sa Vallacar Transit, Inc., ang nagdumala sa Ceres buses, nga ang pagpasaka sa pletihan tungod kay ningmahal ang presyo sa fuel, mga ligid ug operation cost sa kompaniya.
“Kay ang atong aircon nagpundo sa terminal unya kas og fuel kay wa man na gipatay. Di ta magpataka og pataas kay mao ra nay gihatag sa LTFRB,” matod ni Santarin.
Tungod niini, pananglitan ang kanhi pletihan sa aircon bus nga gikan sa CSBT paingon sa Sibonga kay P80, karon mahimo nang P85.
Ang Land Transportation Franchising and Regulatory Board (LTFRB) 7 nakaapud-apod na og 1,090 ka fuel subsidy cards nga may sud nga P5,000 ubos sa Pantawid Pasada Program sa nasudnong kagamhanan ngadto sa mga operator sa Central Visayas.
Kini maoy tabang sa gobiyerno sa mga drayber ug operator sa pagsaka sa presyo sa mga produktong petrulyo tungod sa excise taxes ubos sa Tax Reform for Acceleration and Inclusion (Train) Law.
Sumala ni Metudio Belarmino, tigpamaba sa Cebu Labor Coalition (Celac) diin sakop ang Balacjoda, nga ang P2 nga usbaw sa unang lima ka kilometro sa biyahe sa mga PUJ, maoy dinalian nga alibyo ning pagsaka sa presyo sa nag-unang palaliton ug mga produktong petrulyo.
Siya nipasabot nga provisional nga umento lang aron dali nga maaksyonan sa LTFRB human hangtod karon wa pay aksyon ang LTFRB 7 sa ilang giduso nga petition niadtong Enero ning tuiga nga nihangyo nga himuon P12 ang minimum nga pletihan sa unang lima ka kilometro nga biyahe sa rehiyon 7.
“Mao na ang atong nakita ba nga for how many months na wa may action ang LTFRB nga mopasaka. Kon imong tan-awon, ang taxi nisaka na, ang v-hire na sad, Balamban, kita sa jeepney wa pa man gyud gihapon... So, ang atua, we need immediate relief sa problema sa mga drivers,” pagpasabot ni Belarmino sa pagpangayo og umento dihang nahinabi sa Superbalita Cebu kagahapon.
Ang ilang petition nga mangayo og P2 nga umento isang-at nila karong Lunes, samtang, magsabot sila karong Sabado o Dominggo kon pila ang pangayuon nga umento sa pletihan sa mga trisikol nga isang-at sa mga local government unit nga dunay hurisdiksyon bahin niini.
Ang Balacjoda dunay 93 ka mga miyembro nga mga drayber ug operator og mga PUJ ug trisikol nga nagbiyahian sa dakbayan sa Lapu-Lapu ug Mandaue.
Sigon ni Montealto dali maaksyonan ang provisional nga umento sa pletihan apan, kinahanglan gihapon kini moagi og procedures sama sa public hearing nga maoy naandan nga proseso sa pagsang-at og petition sa transport groups.
“Kay di man na madesisyonan namo og diretso kay moreklamo naman pud na ang mananakay,” dugang sa director sa buwag nga pakighinabi ning mantalaan dungan sa pag-ingon mag-agad ang desisyon sa LTFRB kon dunay mosupak sa umento.
Siya nisugyot sa Balacjoda nga ipasukip sa ilang bag-ong petition ang kopya sa petition nga ilang naduso niadtong Enero aron ma-follow up sa ilang buhatan.
Si Jonathan Tumulak, terminal manager sa CSBT, niadtong Miyerkules lang siya nahibawo sa pagpasaka sa pletihan sa Vallacar Transit pinaagi sa post sa Facebook. SCG