NASIKOP ang usa ka babaye nga aktong nagtaud og braces sa ngipon sa usa ka pasyente kagahapon sulod sa iyang balay sa Barangay Pardo, Cebu City.
Mga sakop sa Criminal Investigation and Detection Group (CIDG) Central Visayas midakop ni Karen Sombilon Bucog, 35. Si Bucog nahibaw-ang mihimo og mga dental procedures nga walay lisensya.
Ang operasyon batok ni Bucog gihimo kuyog ang PNP Dental Service ug ang Philippine Dental Association sa kalapasan sa RA 9484 o Illegal Practice of Dentistry.
Walay napakitang lisensya o papeles si Bucog nga mitugot sa iyang dental practice.
Mga gamit sa dentista nga kasagarang gamiton alang sa orthodontic treatments o braces ang nasakmit kang Bucog.
"Rampant na kaayo ni karon ang mga illegal practitioners," matud pa ni PDA Cebu Chapter head Dr. Felix Asoy.
Nahibaw-an ang kalihukan ni Bucog sa dihang nagpa-ibot og ngipon ang usa niya ka pasyente didto sa clinic ni Dr. Lucilo Niñal.
Si Niñal nga vice president for Visayas sa PDA nakakita nga adunay mga dentures ug braces nga dili angay buhaton kung tinu-od pa nga dentista ang mitrabaho niini.
"Ingon ani ka intense among action kay dili kami ang ma-apektado. Ang apektado ang mga pasyente nga mahimong victims. In any procedure, bisan kinsa nga expert, naa gyud possibility nga naay complications. How much more sa dili expert," matud pa ni Asoy. (KAL/With MCB)