ANG Davao City National High School (DCNHS) sa boys ug girls high school division parehong misulod sa finals sa 2nd Philippine Sports Commission (PSC) didto sa DCNHS gym adlaw’ng Biyernes.

Daling gitagak sa DCNHS boys ang Catalunan Pequeño sa semifinals sa iskor 25-17;25-16 aron makalaban ang Do¤a Carmen Deña National High School sa finals (DCDNHS) nga midaug batok Pablo Lorenzo NHS sa iskor 16-25;26-24;24-26.

Kompiyansa ang team captain sa DCDNHS nga si Rovic S. Payot, Grade 11, 16-anyos nga bisan unang higayon nila miapil sa kompetisyon kaya nila pildihon ang DCNHS.

“Yes, bilog ang bola. I-execute lang namo ang play, i-perform namo among position ug just work hard. Nasabay na pod namo sila sa DCAA last year nakita namo ilang dinulaan,” atol sa pakighinabi kaniya human sa ilang duwa.

Samtang bahin ni DCDNHS Coach Jayson P. Rodado nga gusto gyud nila makalaban ang maong bug-at ug kusog nga tim.

“Ma-amaze gyud ko sa team DCNHS kay kusog lagi sila na team. Gina-wish sab namo nga mag-abot mi kay para mahibal-an namo kung asa mi kutob. Wala man namo sila nakalaban sa DCAA last year, nakita lang namo sila.”

Ang Cat. Pequeno ug Pablo Lorenzo maoy magkontra alang sa bronseng medalya.

Sa high school girls semifinals, gipakyas sab sa DCNHS ang Tagakpan NHS nga makuha ang titulo sa iskor 25-15;25-17 aron makalaban nila ang F. Bangoy NHS sa kampeyonato human gipalukapa ang Baguio NSAT sa iskor 24-26;26-24 ug 11-25.

Tungod niini, ang Baguio NSAT ug Tagakpan maoy magkontra sa ikatulong puwesto.

Ang Tambobong Elementary ug V. Hizon Elementary mag-abot sa finals sa girls dibisyon human gipayukbo ang ilang tagsa-tagsa ka kalaban.

Gipildi sa Tambobong ang Kabacan sa iskor 25-23;23-25;16-25 samtang gidomina sa V. Hizon ang SpED Bangkal sa iskor 25-19;23-25 ug 25-18.

Sa elementary boys, mibawi ang Kabacan nga nakaikyas kontra Baliok Elementary sa iskor 25-17 ug 25-22 aron makontra nila ang Kapitan Tomas Monteverde Elementary School sa finals kinsa gipakyas ang Malagos Elementary School sa iskor 25-9 ug 25-13.