DEAR Noy Tikyo,
Ang akong problema bahin sa akong uyoan ug iyaan. Kaniadto, ila lang mi daug-daugon kay kabus kaayo mi kay si Papa sugarol ug palainom. Samtang ang akong mama, wala poy trabaho. Mao nga naglisud mi kaniadto.
Miabot pa gani sa punto nga nagpakatabang ko sa akong uyoan ug iyaan.
Didto nako nasinati ang kabati sa ilang mga batasan kay ila ra man kong patrabahuon nga way suweldo. Usahay di pa ko nila pakan-on. Mata-pobre kaayo ang akong uyoan ug iyaan.
Sa tinuod lang, ang side ni Papa adunahan apan tungod kay nagbisyo si Papa, mao tong wa gyud niya pamahimusli ang iyang bahin gikan sa katigayunan sa ilang ginikanan, apil na ang among luna nabaligya nga way klaro.
Naa poy ubang mga igsuon ni Papa nga wa ra pod magtagad namo.
Apan karon, tapos na ko og eskuwela pinaagi sa akong kaugalingong paningkamot. Gani, maestra na ko karon ug nagtrabaho na sa public elementary.
Pero bisan pa niini, naa pa gihapon ang akong kasilag ug pagdumot sa akong mga iyaan ug uyoan kay wa gyud sila magpakabana namo.
Karon, magsige na sila og tagad nako. Mangimbita na nga didto ko sa ilang paestaron o kaha pakan-on. Pero ako lang gipalabay kay wala pa mawala ang akong kasuko nila.
Maayo kaha ang akong gibuhat, Noy?
Patricia
*****
Patricia,
Di ko ikaw mabasol kon naingon ka niini ngadto kanila karon. Di sab lalim ang imong naagian sa mga kamot sa imong mga uyoan ug iyaan kaniadto.
Apan, seguro nakalabay na man tong mga panahona, unya karon edukada ka na ug duna nay trabaho, I think angay mo na silang pasayluon sa ilang gibuhat.
Sa tan-aw nako, nakaamgo na sila sa ilang gibuhat kay sila na man karon ang naghimo og inisyatibo aron nga maduol ka kanila, so bawsi sab kini og maayong pagtagad.
Ayaw ipatigbabaw ang imong kasuko kay wa kini maayong kapaingnan. Di sab ka magmalinawon sa imong pagpuyo kay duna pa may kasuko ang imong kasingkasing ngadto nila.
Bahala na og di ka moadto o mosanong sa ilang imbitasyon basta ipakita nila nga imo na silang gipasaylo sa ilang nabuhat.
Lisud ning himuon apan pinaagi sa pag-ampo ug sa grasya sa Ginoo, imo ra kining mabuhat.
Noy Tikyo