HELLO, basta gani libre dali ra makadakop sa akong atensiyon, beshy. Sa kamahal sa palaliton, natural nga mangita kita'g baratuhon. Kung dili lang ulaw - lami god pangayuon apan siyempre, dili kini makaangayon nga gawi mao dili nato buhaton. Puwede ra mohangyo.
Ang sili mag-usa ka libo na ang presyo sa ubang dapit. Ang gasolina, kuryente, pagkaon ug uban pa naglumba na pod og taas ang mga presyo, higala. Dili man ko brayt mo-explain sa “inflation” mao dinhi ta sa hisgutanan nga dili pod kaayo tantung “bulokon.”
Kung motan-aw ta sa kasamtangan, daghan gayud ang naglisud, mga kahigalaan. Apan, dili unta kini makaguba sa atong dughan, ug makawala sa atong kahinam nga mopadayon sa unahan. Instead of looking at the bad things, sulayan nato'g ihap ang mga ginagmay'ng mga panalangin kasi basi diay'g mas dako kini kontra sa presyo sa mga palaliton, pare.
Una, libreng gibubo sa Ginoo ang grasya Niya kanato kay buhi pa man ta karon. Wala pa man pod metrohan ang atong mga ginhawaan mao ato gayud kining pasalamatan.
Sa akong paglakat sa dalan kagahapon, namupo ko'g “spinach” kun “kulitis” sa kilid sa dalan. Akong gisagol sa nilagang karne- sulbad ang paniudto, beshy. Namunga na pod ang bayabas sa silingan mao ningpalit ning inyong igsuon apan wala man gidawat akong bayad. Ang pagkamaginhatagon sa uban- libre pa diay, kahigalaan.
Si sister Vivs Sarigumaba nga ning-abot gikan sa uma, gitunolan ko'g hilaw nga mga mangga, durian nga puyat ra ba ug lanzones nga hastang tam-isa mao apil akong bityok sa tiyan nagsadya.
Gusto pod ko ma-“happy” pinaagi nga simple ug libre mao ningmata ko'g kaadlawon dala baktas gikan sa among balay padulong sa palengke dala kiaykiay sa parke unya baktas na pod pauli. Exercise nga libre (apil abog he he) pero nagsampong sa ilong kay aron dili magka TB (sakit sa baga).
Ang pag-exercise base sa mga pagtuon makapalipay kanato, igsuon, kay magpagula kini og kemikal sa atong utok nga ginatawag og “serotonin.” Ang serotonin diha sa utok gihunahuna nga makontrolar ang pagkabalaka, kalipay, ug pagbati. Ang ubos nga ang-ang sa kemikal nalangkit sa depresyon. See, ginagmay'ng kembot ug pagbaklay-baklay kay makapalipay diay!
Sa katapusan, happiness is a choice. Puwede ra kita magmasulob-on kung motan-aw ta sa atong mga limitasyon sa kaugalingon apil ang problema sa kalibutan, igsuon.
Apan, mamahimo pod kitang magmalipayon pinaagi sa pagbaton og kasingkasing nga malipayon luyo sa bisan unsang pagsulay o bagyo sama ni Ompong, migo. BE HAPPY!!! Ok?