SECTIONS
Tuesday, September 18, 2018
SUPERBALITA DAVAO

Nagkalalis, gipatay sa ugangan

ALEOSAN, North Cotabato -- Unom ka mga bala ang mitaop sa lawas sa usa ka negusyante human gipusil sa iyang ugangan.

Nahitabo ang pagpatay kang Ruden Dalid Kulintang, 28, fish vendor, molupyo sa Purok 5, Barangay Pagangan, Aleosan alas 7 sa gabii niadtong Huwebes, Septiyembre 13.

Nasayran gikan kang Superintendent Bernard Tayong, tigpamaba sa North Cotabato Police Provincial Office, nga nagkalalis ang biktima ug iyang ugangan nga si Mustapha Diagao gumikan sa personal nga bikil sa yuta nga ilang giugmad.

Kalit lang, matud pa, mihulbot si Diagao sa iyang dala nga kalibre .45 nga pistola ug gipusil si Kulintang sa makadaghang higayon.

Abtik sab nga miikyas si Diagao paingon sa hilit nga dapit sa Barangay Pagangan.

Gisapupo ang biktima sa iyang pamilya ug gidala ngadto sa Aleosan District Hospital apan nakabsan kini sa kinabuhi.

Gipangita na sa kapulisan ang suspek ug gitakda nga pasakaan og kasong pagpatay. (Edgar E. Fuerzas)


VIEW COMMENTS