SECTIONS
Tuesday, September 18, 2018
SUPERBALITA DAVAO

Pulis mi-sideline baligya og shabu

DAVAO. Giposasan si Police Officer (PO) 1 Quirubin Cris John Coyno Ferido kinsa naka-athletic PNP uniform pa dihang na-drug bust kini sa operatiba sa Talomo Police Station, Biyernes sa udto. Makita sa hulagway si Chief Inspector Ronald Lao, (wala) hepe sa Talomo Police Station, kinsa maoy nangunay sa pag-inventory sa mga ebidensya dihang nasikop ang suspek. (Hulagway gikan sa Talomo PNP)

BISAN og doble na ang suweldo sa kapulisan, nahimo gihapon sa usa ka pulis ang pagpamaligya og shabu hinungdan nga mihimo og drug bust operation ang Talomo Police Station ug malampusong nasikop ang suspek.

Alas 11:45 Biyernes sa buntag, Septiyembre 14, atubangan sa Flying V gasoline station, sa Purok 9, Barangay Catitipan, Davao City, malampusong nadakpan ang suspek nga si Police Officer (PO) 1 Quirubin Cris John Coyno Ferido, 30, taga Mankilam, Tagum City.

Ang suspek naka-uniporme pa og athletic PNP uniform dihang gitunol niini ang usa ka pakite sa gituohang shabu nga nagkantidad og P3,000 ngadto sa nagtakuban nga operatiba.

Sumala ni Chief Inspector Ronald Lao, hepe sa Talomo PNP, nga daan nang nadestino sa Regional Police Holding and Accounting Office (RPHAO) ang nasampit nga suspek gumikan migula ang impormasyon nga dunay ilegal nga aktibidad ang suspek partikular sa ilegal nga druga.

Daan nang nagbutyag ang bag-ong director sa Police Regional Office (PRO)-Davao Chief Superintendent Marcelo Morales nga pahamtangan gayod og silot ang si bisan kinsa nga mosupak sa balaod.

Atol sa hamubo nga press conference sa Talomo PNP, gibutyag niini nga pakusgan pa nila ang kampanya sa pagbatok sa ilegal nga druga sa komunidad ug mopahigayon sila og mga random drug testing sa ilang hanay.

Kahinumdoman mismong si kanhi PNP chief director general ug karon chief sa Bureau of Correction Ronald dela Rosa ang nagpakusog sa internal cleansing program sa Philippine National Police human naduhig ang pipila ka kapulisan sa druga samtang nagpadayon ang kampanya sa pagbatok niini.

Si Police Officer (PO) 1 Ferido, mag-atubang kini og kasong administratibo ug kriminal samtang gibalhog sa prisohan.

Kasong pagsupak sa Republic Act 9165 kon Comprehensive Dangerous Drug Act of 2002 ang atubangong kaso ni PO1 Ferido.


VIEW COMMENTS