BOPK nga mikaw-it sa LP kalit nga mibalhin sa PDP-Laban sa miaging piniliay. Sa nagdagan nga pangalagad nagkainitay sila Pres. Rodrigo Duterte ug Mayor Tomas Osmeña. Nagsugod sa dihang si Justice Sec. Vitaliano Aguirre mipasangil ni Osmeña nga drug protector basi sa apidabit sa ig-agaw ug bagman sa gipatayng druglord Jaguar Diaz nga si Jumbo Diaz nga nadakpan sa Sorsogon.
Giingong misumbalik si Osmeña nga si Duterte drug protector. Kahinomdoman si Sen. Antonio Trillanes mitumbok nga maoy drug protector ang anak ni Duterte nga si Davao City Vice Mayor Polong Duterte ug umagad Atty. Manases Carpio nga giingong sakop sa Davao group basi sa pasangil sa customs fixer Mark Taguba kabahin niadtong 6.4B pesos palusot nga shabu sa BOC.
Misamot pagsinta si Duterte sa giingon ni Osmeña nga dili lang pahilabtan ang Sugbo ubos sa iyang pagdumala. Maong naminte si Duterte nga palayason si Osmeña ipaguyod ang Sugbo sa Pacific. Gihulagway nga si Osmeña hambugero, arogante ug taas og sinultihan nga dili man maoy tag-iya sa Sugbo.
Putang ina nunot sa pag-agni nga magtukod sila og grupo si Osmeña, Sison, Trillanes ug Atty. Elly Pamatong nga ginganlan ni Duterte nga boang (crazy) sa dihang mianunsyo sa miaging tuig nga siyay puli ubos sa latagaw nga pasangil nga depektoso ang papeles sa kandidatura ni Duterte ug himalatyon.
Pun-an pa nga si Osmeña gipasakaaan og lima ka kasong administratiba sa kapolisan gumikan sa pagpagawas sa tulo ka mga dinakpan sa Parian Police nga sila si Ramir Amaca, Romeo Apareca ug Romeo Cuevas nga namaligyag refilled butane canisters sa T. Padilla Public Market.
Nahadugang sa daghang mga kaso batok ni Osmeña nga dunay hungihong nga nag-ong-ong ang suspension order. Niini makapabor si Vice Mayor Edgardo Labella ug Mike Rama nga nakahukom na nga maoy moparis. Ambot kinsa kahay alas ni Osmeña sa palibot ni Duterte.
Wala na mokuyog si Osmeña milihay sa iyang reaksyon sa pagtuo nga dunay nakasolsol sa presidente. Gani ang magtiayong Osmeña nakigkita ni House Speaker Gloria Arroyo nga mahimong tulay ngadto ni Duterte. Padayong moserbisyo samtang anaa pa ang mga Sugbuanon. Dunay obserbasyon nga mahimong underdog si Osmeña sa kastigo ni Duterte dalan nga maoy makapasubli sa Serging magic.
Kaniadto underdog siya batok Mayor Boy Cuenco. Pangilaw ug matulog sa Pasil ug Ermita nga nagpahinomdom nga siya anak ni Serging. Gilupig si Cuenco sa debate bahin sa tartanilya. Si Serging giingong maoy manluluwas sa demokrasya. (csa_1156@yahoo.com/09064648954)