KASAGARAN nato, bisag nagkayamukat, nagkadipo-dipo, bug-at na kaayo ang gibati o naghangos na sa pag-ginhawa sa tumang stress, mahadlok mangayo og professional nga tabang o mauwaw kay basig panganlan na hinuon og buang.
Gawas ini, mahal sab ang professional fees sa mga mananambal og inoras nga psycho- therapy sessions.
Kita tanan makasinati og daghang problema nga usahay magdungan gikan sa panginabuhi, padagan sa balay, relasyon, o sakit-sakit nga maoy hinungdan sa stress. Kung kini di dayon ma-agapan, delikadong malisoan sa pangisip o makabsan sa kinabuhi.
Matod sa WebMD, lain-lain og reaksyon atong lawas depende sa gidaghanon ug gibug-aton sa gipas-ang stress. Ang uban nga maayong modala sa problema makalabang ug makalingkawas sa delikadong epekto. Apan niadtong mikomkom sa ilang gipangdala nga way kasultihan o kapaguwaan sa gibati, delikadong mopa-ingon sa kadaot sa kaugalingon.
Tungod kay di man dayon makita ning sakita kay naa man sa sulod, diay mga simtomas nga makatabang pag-ila:
Seging kakapoy ug sakit-sakit sa panlawas sama sa sakit sa tiyan, ulcer, lu-as, panuhot, bikog sa kaunuran, labad sa ulo, huot sa dughan, kusog sa pinitik sa kasing-kasing og hapoy i-ginhawa.
Sunod ang problema sa pagkatulog. Kasagaran ma insomnia. Ang uban sab, masubrahan sa katulog maong magluya o makasinati og tumang kakapoy. Ang uban damguhon og kuyaw unya alingasa sa higdaanan.
Mokalit sab og usab ang timbang. Ang uban grabing mohiyos kay wa namay ganang mokaon. Ang uban sab moburot kay non-stop ang pagkaon.
Ang uban sab magsegi og huna-huna sa trabaho. Bisag panahon na i-pahuway, nag segi pa gihapon og gamit sa computer, basa og email, messages, dawat og tawag.
Mailhan sab nimo ang na stressed kay di kini mahimutang, way pasensiya, putong ug dali kaayo masuko.
Ang uban paingon sa pagka-arot sa buhok nga sa ngadto-ngadto paingon sa ka upaw.
Kasagaran sab ma wad-an na og gana makig-romansa o makighilawas.