SECTIONS
Tuesday, September 18, 2018
SUPERBALITA CEBU

Peke nga dentista gidakop sa CIDG

Fake Dentist. Gidakop si Karen Bucog sa CIDG 7 human gireklamo ning modawat og mga kliyente nga magpahimo og pustiso ug braces bisan di siya lisensiyado nga dentista. (Arnold Y. Bustamante)

POSAS ang misugat sa usa ka nagpailang dentista sa Barangay Basak Pardo, siyudad sa Sugbo human ni gi-entrap sa mga sakop sa Criminal Investigation and Detection Group (CIDG) 7 sud sa iyang balay.

Ang nadakpan giila nga si Karen Bucog alyas Janice nga kanhi dental assistant sa nasud sa Riyadh diin didto siya nakat-on sa paggama sa braces sa ngipon nga iya usab gihimo dihang miuli kini sa siyudad sa Sugbo.

Usa ka Marie Grace Brioso ang nagpahimo niyag braces apan giingnan siya niini nga di mahimo kun dili niya ibton ang ubang daot nga ngipon nga maoy hinungdan nga miadto kini sa clinic ni Dr. Lucilo Niñal nga maoy vice president sa Philippine Dental Association(PDA) Visayas.

Apan nasuta nga sayop ang gihimo sa iyang braces nga di na matangtang tungod kay gikonektar kini sa postiso nga maoy hinungdan nga gipangutana kini kun kinsa ang nagtaod.

Dinhi na nasuta sa dihang gisubay sa PDA sa Sugbo nga di lisensyado ug di usab dentista si Bucog ug pinaagi lang sa social media kun online ang transaction sa iyang pasyente.

Tungod niini mireklamo na dayon sila sa CIDG-7 aron maaksyonan kini ug di na kini makapamiktima pag daghang magpahimo og ngipon o retainer sa ilang ngipon.

Nakuha sa CIDG-7 ang tanang gamit sa usa ka dental clinic sa sud sa balay sa dinakpan ug wa ni makapakita og papeles nga siya lisensiyado nga dentista.

Giangkon niya nga usa lang siya ka dental assistant sud sa tulo ka tuig didto sa Riyadh ug ang iyang nakamaohan iyang gihimo sa dihang mipauli siya sa Cebu.

Alang niya nga ang iyang gihimo mao ra ang pagtabang niadtong mga tawo nga dili makabayad sa dagkong kantidad sa pagpahimog pustiso ug braces.

Apan andam niyang atubangon ang salaod nga iyang nahimo sanglit nasayod siya nga dakong sayop ang iyang gihimo .

“Dental assistant ko didto, didto man gud ikaw gyud ang mo assist sa dentist pero sayop gyud ni akong gihimo kay dili baya ko dentist pero kaso lang nakita nako sa Facebook daghan nag-ingon ana,” matod ni Bucog.

Giklaro sa PDA sa Sugbo nga risgo sa usa ka pasyente kun moduol kini sa mga di tinuod nga dentista sanglit mahimong makamatay ang pagpahimog ngipon.


VIEW COMMENTS