INIT nga gipikhan na usab ni Gennady Golovkin si Saul ‘Canelo’ Alvarez pinaagi sa pag-akusar sa nauwahi nga usa ka tikasan.
Si Golovkin, ang world champion sa middleweight divison nga wala pa makatilaw og kapildihan, makigbinukbukay na usab ni Alvarez didto sa T-Mobile Arena sa Las Vegas karong Dominggo isip rematch sa ilang away sa niaging tuig nga nitaos sa kontrobersiyal nga panagtabla.
Gikatakda unta ang ilang rematch niadtong Mayo 5, apan nakanselar kini human si Alvarez nagpositibo sa usa ka ginadili nga druga nga maoy hinungdan nga gisuspenso kini og unom ka buwan.
Hinuon gipasabot ni Alvarez nga ang gidiling substance nga nadiskobrehan sa iyang lawas nagagikan sa kontaminadong karne nga iyang nakaon ug dako siyang inosente niini.
Apan si Golovkin hugot nga miinsister nga dili malilong ni Alvarez ang kamatuoran gumikan kay dunay makitang mga marka sa injection sa mga kamot, braso ug uban pang bahin sa kalawasan niini.
Giangkon ni Golovkin nga bisan og nakontrobersiyal ang una nilang sangka, maayo gihapon ilang relasyon, apan nagusbat kini human nagpositibo si Alvarez sa drug test. JBM