MOABOT na ngadto sa lima ka tuig ang pagpatuman sa balaod nga nagpanalipod sa katungod sa mga batan-on nga dili mapasakaan og kaso sa ilang mahimo nga salaod.
Apan daghan sa mga pulis ug hepe sa pipila ka mga presintuhan ning siyudad sa Cagayan de Oro ang supak niini human namatikdan nga misaka ang krimen nga naglambigit sa mga mga minor de edad.
Si Police Senior Inspector Buenaventura Reyes hepe sa Police Station 2 sa Cogon nibutyag sa Sun.Star Superbalita nga dako gyud ang iyang pagsupak sa maong balaod tungod kay bisan dako nga krimen ang nahimo sa usa ka bata igo na lamang kini i-kostudya sa ilang buhatan ug ipatawag ang mga ginikanan.
Apan walay kasong mapasaka niini tungod kay protektado man sa balaod nga "Republic Act No. 9344 "An act establishing a comprehensive juvenile justice and welfare system, creatingthe juvenile justice and welfare council under the Department of Justice and Appropriate funds".
Matud ni Reyes nga 90 porsinto sa mga petty crimes ang binuhatan sa mga minor ug walay adlaw nga dili mahitabo sa area sa PS2 ang mga pagpanglungkab, pagpangawat ug uban pa.
Gituohang nga posibleng dunay nagpaluyo sa mga batan-on diha sa paghimo og kremin tungod kay dili man sila mahimong pasakaan og kaso.
Dugang ni Reyes nga bisan sa pagpanglugos ang mga minor de edad walay pwedeng kaso nga ipasaka.
Kahinumduman nga niadtong nilabayng bulan usa ka nueve anyos ang gilugos sa tulo ka mga minor de edad.