GIHIMO sa Sugbuanong mga delegado sa Batang Pinoy National Championships ang tanang mga pag-amping gumikan kay gihampak ang siyudad sa Baguio sa kusog nga hangin ug uwan tungod sa bagyong Ompong.
Ang Baguio ug Benquet gipaubos sa Storm Signal No. 3 sa weather bureau PAGASA human nag-landfall ang bagyong “Ompong” sa Cagayan nga naghudlat sa bagang sakop sa Northern Luzon.
Ang mga lumolupyo sa Baguio City giawhag nga magpabilin una sa ilang tagsatagsa ka panimalay.
Ang delegasyon sa Cebu Province, nga naabot sa Bagiuo niadto pang Huwebes sa buntag, nakapangandam nang daan sa pag-abot ni Ompong.
“Before the landfall we met the athletes and coaches and instructed them to stay indoors, stack food and water. The coaches and our staffs were also instructed to monitor the situation and directly relay it to the sports commission so we can report it to the LGU,” matod ni Cebu Provincial Sports Commission (CPSC) executive director Atty. Ramil Abing sa interbyu sa SunStar Cebu.
Gipaneguro ni Abing nga ang tanang mga atleta sa Cebu Province naa sa luwas nga kahimtang sa pagsusi sa CPSC, Philippine Sports Commission (PSC) ug local government unit sa Baguio City.
“The athletes are safe in the billeting center. I got a lot of calls from parents and I told them not to get worried. We hope that the weather will get better,” matod ni Abing.
Ang Cebu Province adunay 170 ka mga delegaso alang sa kompetisyon.
Nagkanayon si Mandaue City Sports Commission officer-in-charge Stephen Jumao-as miasoy nga naa sa maayong kahimtang ang ilang mga atleta nga kasamtangang nagpuyo sa Central Elementary School.
Ang Cebu City Niños natanggong pa sa PhilSports Arena sa Manila samtang naghuwat sa paghupay sa bagyong Ompong.
Karong adlawa nakatakdang mobiya ang 342-man team sa Cebu City gikan sa Manila paingon sa Baguio City. (RSC, ESL)