SAMTANG naghudyaka ang kalibutan sa dili malimutan nga away sa boksing nila ni Manny "Pacman" Pacquiao ug Miguel Cotto niadtong Nobyembre 15, may nag-antus karon sa ospital.
Upat ka mga fans ni Pacman sa Sto. Tomas nangasunog sa dihang nisaghid ang ilang TV antenna sa high tension wire sa kuryente.
Sa hilabihang kahinam sa mga biktima nga maklaro nila ang kadaugan ni Pacman batok sa champion nga taga Puerto Rico, ilang giliso ang antenna sa ilang silingan.
Di pa kontento, ila pa kining gipataas hangtud nga naigo nila ang high tension wire. Hinuon walay namatay kanila kay upat man silang nitabang sa pagpatindog sa antenna apan di matukip ang paso nga ilang nahiaguman. Nasunog ang tibuok nilang lawas, ang usa naputol pa ang walang kamot kay naglikos man sa iyang bukton ang wire sa antenna. May miburot ang itlog, nangabuto ang lawas ug dili makaihi ug silang tanan anaa karon sulod sa Mindanao Burn Center sa DMC.
Ang duha ka magsuon nga nabiktima gikan pa sa Cagayan de Oro ug nilalin dinhi sa Davao del Norte aron motrabaho sa sagingan. Apan unsang hitaboa nga ilang gihilabtan ang antenna sa TV sa ilang silingan mao nga nangasunog sila. Hangtud karon dili pa sila makaseguro sa ilang kaayohan tungod sa kakabus. Wa silay kuwarta nga ikapalit sa ilang mga resita.
Gikahinabi ko ang inahan sa duha ug unta makigkita siya kang Manny Pacquiao aron mangayo og tabang. Matud pa niya nga dili man niya gipakasala si Manny sa nahitabo sa iyang mga anak apan basin ra'g matandog ang balatian sa Pambansang Kamao nga gikan usab sa kalisod.
Dugay nang fans ang iyang mga anak ni Manny busa bisan may trabaho ila gayong hunungon aron lang makita ang ilang idolo. Bisan gani sa ilang pagkaon naglisod kaayo ang pamilya mao nga iya na lang gi-ampo sa kalangitan ang kinabuhi sa iyang mga anak. Busa pila may palad nga mabasahan kining gamay'ng kulom sa Sunstar Super Balita nga pinakakusog nga basahong binisaya sa Southern Mindanao ug matabangan sila.
Gihangyo pod nako ang mga magbabasa niini nga ipadangat daw kining ilang problema ngadto kang Manny nga nangandam karon sa umaabot nga Pacquiao-Clottey fight didto sa Dallas, Texas, o kaha kang Nang Dionesia nga susama kang Manny, may malumo usab nga kasingkasing sa kabus.
Pacquiao-Clottey fight madayon
Human sa dugay nga pagpanaghap, naluto ra gayud ang away sa atong Pambansang Kamao batok sa garbo sa Ghana, Africa nga si Joshua Clottey karong Marso 13.
May nakauyon, aduna say nasayangan sa nabugha nga away nila ni Mayweather nga way pildi hangtud sa pagretiro. Dili sab basta-basta ang record ni Clottey kay wa pa kini mapildi sa TKO ug nibahad pang patulgon niya si Pacman pinaagi sa iyang nagpungasing sumbag.
Hinuon, matud pa niya nga iyang idolo si Pacman ug nagpasalamat siya nga gihatagan ug kahigayonan nga makigsangka kaniya ug nagpasalig nga himuon ang tanan aron mabuntog niya ang pound-for-pound king. Wa daw amigohay ug idolohay ibabaw sa ring busa andaman nato kining maong bahugbahog.