GIHANDOM sa mga sakop sa Bansalan Police Station ang usa ka tuig nga kasumaran sa pagpamanhig patay sa ilang mga kaubanan niadtong Pebrero 2, 2009.
Gibanhigan patay sa mga rebeldeng New People's Army (NPA) nga sakop sa Committee Front 51, ang grupo ni Senior Inspector Emelix Mabalot, samtang mikanaug kini gikan nagkuha sa tawong gipatay sa mga rebelde, didto sa Sitio Balagonon, Barangay Managa sa lugar.
Patay sab niadtong higayona sila si Police Officer 3 Vernie Luis Humol, Police Officer 3 Roel Salces ug ang tanod nga si Rody Dela Paz.
Samtang nalingkawas sa kamatayon sila Senior Police Officer 4 Efren Suico, Senior Police Officer 4 Uldarico Castardo ug auxiliary police Pidong Rupenta ug drayber sa patrol car nga si Senior Police Offcier 3 Teofanes Leornas.
Si Suico ug Rupenta igo lang natapsingan sa mga bala. Si Chief Inspector Solomon De Castilla, ang nihulip pagka-hepe ni Mabalot.
Sumala niya nga usa ka misa ang ilang himuon sa ilang istasyon isip pahinungod sa mga namatay'ng kaubanan.
Samtang ang mga biyudang sila si Jocelyn Humol ug Lilian Mabalot, ang nipahibawo nga di sila makatambong sanglit aduna sab sila'y himuoong selebrasyon sa sementeryo.
Dungan niini, usa ka wreath laying ceremony' didto sa Police Regional Office-XI ang ihalad sa Camp Catitipan sa ilang Heroes Park, karong Pebrero 3.
Dungan niini, gipataas na sab sa kapulisan sa lugar ang ilang alerto dungan sa selebrasyon.
Sud sa usa ka tuig, giingong gikasohan na sa kapulisan ang mga responsableng sakop ni Ka Marvin, apan bisan usa sa mga sakop niini way nasikop ug nasilotan. (Orlando B. Dinoy)