Mga pamilya gipabakwit

BISAN kon way natala nga dagkong kadaut ang hinungaw sa bagyong Ompong sa Sugbo, apan, nakasugat og problema ang local disaster officers sa pagpabakwit sa mga pamilya nga naa nanimuyo daplin sa mga baybayon.

Matod ni Jules Regner, information officer sa Provincial Disaster Risk Reduction and Management Office (PDRRMO), nga bisan og duna nay military ug mga pulis, apan nagmagahi gihapon ang ubang mga pamilya nga naa nagpuyo duol sa baybayon sa Barangay Dumlog, dakbayan sa Talisay.

“Gahi man gyud sila kaayo mao to naay mga military, naay mga pulis. Ang uban nituo baya sila, pero ang uban wala gyud pero, dili tanan ang wa gyud nituo. Pero ang ato ana atong gipa-emphasize especially the mayors nga para ra man gud na sa ilahang kaayuhan ang atong gihimo ba,” pagpasabot ni Regner kon nganong gipabakwit nila ang maong mga pamilya.

Siya nisaysay alas 10 pa lang sa gabii niadtong Biyernes nagpadala na sila og mga pulis ug sundawo aron pugson ang nameligro nga mga pamilya nga mohiklin, apan ang uban niini ala 1 na sa kaadlawon namiya sa ilang balay dihang nakita nga dagko na ang mga bawod.

Si Regner namahayag nga mao kini ang kinahanglan nila nga tun-an kon unsay angay nga buhaton sa mga pamilya nga magmagahi.

“Sa protocol gyud nato, sa local na nga initiative, nga sila’y mohangyo kay naapil man gud na sa atong training. If ever way waiver, wa tay waiver gipa-signan nila, kinahanglan ipugos gyud na nato, labi na kon makita nato nga grabe na ang bawod, madaut gyud ang atong mga kaigsuonan ba,” padayag niini.

Sa talaan sa PDRRMO, niabot og 148 ka mga pamilya nga nagpuyo sa coastal areas ang gipabakwit ngadto sa mas luwas nga lugar sama sa sports center o gym sa barangay ug mga tunghaan tungod sa kadagko sa mga bawod nga nihapak na sa kabalayan daplin sa baybayon.

Labing daghan sa maong mga pamilya natala sa siyudad sa Naga nga niabot og 68 ka pamilya: 28 sa South Poblacion, 18 sa North Poblacion, 7 sa Tuyan ug 15 sa Colon.

Sa dakbayan sa Mandaue, 11 ka mga pamilya sa Barangay Tabok; sa dakbayan sa Lapu-Lapu, 15 sa Buaya; ug 4 sa Suba Basbas; ug sa siyudad sa Talisay, 50 ka mga pamilya sa mga barangay Dumlog, Poblacion ug Cansojong.

Sumala ni Regner nakauli na ang tanang mga pamilya nga namakwit kagahapon.

Sa pagkutlo ning balita kagahapon, way nadawat nga report ang PDRRMO gikan sa mga lokal disaster officers sa kalungsuran ug dakbayan sa lalawigan nga dunay namatay, naangol o nangawa gumikan sa bagyong Ompong.

Wa usab nataho nga pagdahili sa yuta sa probinsya apan o napadpad nga mga atop, apan dunay mga dapit nga gipangbahaan sama sa siyudad sa Danao, ug mga lungsod sa Medellin ug Carmen nga unang giila sa PDRRMO nga bahaunon nga mga dapit.

“Pasalamat ta sa Ginuo, sa Señor Santo Niño nga wala gyuy mga kadaut nga natala sa karon,” sigon ni Regner dihang nahinabi sa Superbalita Cebu kagahapon.

Dunay pipila ka mga punoan sa kahoy sama sa gmelina ang natumba sa lungsod sa San Francisco, isla sa Camotes. (SCG, Mark Joven Igot - USJ-R Intern)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph