NAHIBALIK na kagahapon ang tanang mga biyahe sa barko sa pantalan sa Sugbo ug Bohol.
Samtang kagahapon sa alas 5:00 sa hapon dihang gilibkas na sa Philippine Atmospheric, Geophysical and Astronomical Services Administration (Pagasa) ang gale warning sa Central Visayas.
Apan alas 6:00 kagabii, padayong wa tugoti sa Coast Guard ang biyahe paingon ug pagawas sa Northern Leyte, Samar, ug Western Visayas.
Mga biyahe sa Southern Leyte ila usab nga gitugot, apil na ang sa Mindanao.
Nasayran nga unang gilibkas ang suspensyon sa biyahe sa barko kagahapon sa alas 2 sa hapon sa pantalan sa Bato, Santander diin ang iyahe paingon sa Sibulan ug Tampi, Negros Oriental.
Gisundan kini sa biyahe gikan sa pantalan sa dakbayan sa Sugbo paingon sa Tubigon, Bohol.
Matod ni Lt. JG Michael John Encina nga gilibkas nila ang tanang suspensyon sa biyahe sa barko kagahapon sa alas 5 sa hapon human gilibkas usab sa Pagasa ang gale warning sa Central Visayas.
Sa wa pa nila gibalik ang biyahe sa barko, nakatala pa ang PCG 7 og 546 ka mga pasahero nga stranded, diin 48 niini sa Bohol ug 498 ang Cebu.
Nakatala usab sila og 207 ka rolling cargoes, 65 ka vessels, ug 25 ka motorbancas ang wala pabiyahea kagahapon.
Unang nianunsiyo ang PCG 7 nga karong alas 5 sa buntag unta nila pabalikon ang biyahe sa barko, apan nasinati na sa Sugbo ang maayo nga panahon diin niinit na kini.
Niadtong Huwebes sa alas 5 sa hapon dihang unang gi-suspend sa PCG 7 ang biyahe sa barko sa mga pantalan sa Sugbo ug Bohol, nagpadayon kini hangtod kagahapon. (S)