Comelec mitubag nga way gipaboran

ANG Commission on Election (Comelec) sa Davao del Sur nagklaro nga wa nakalapas sa omnibus election code kun gun ban tungod sa pagbuhi sa grupo ni Autonomous Region in Muslim Mindanao (Armm) Assemblyman Khadafeh Gahuil Mangudadatu niadtong Biyernes sa hapon, ang adlaw nga sila nasikop sa Joint Security Control Center (JSCC).

Gigukod sa pwersa sa Davao del Sur Public Safety Management Security sila si Mangudadatu kay wa nihunong sa checkpoint sa siyudad sa Digos, butang nga gilimod ni Mangudadatu kinsa mirason nga di sila masinupakon sa balaod.

Sumala ni Mangudadatu nga wa gyud nila nakita ang kapulisan ug militar nga nagbantay sa lugar mao nga nipadayon sila sa ilang biyahe.

Apan, pag-abot sa Km. 71, Barangay Sinawilan, Matanao, Davao del Sur, naabtan sila sa mga pulis sanglit duna sab grupo sa JSCC sa dapit mao nga gisita ang naghinobra kadaghan nga gwardiya ug sa mga armas niadtong higayona.

Nilutaw karon ang daghang pangutana kun nganong wa gipadayon sa Davao del Sur Provincial Police Office (DDSPPO) ang pagpasaka og asunto sa mga gidakop kinsa gibuhian mga alas 5 pasado nianang pagka-hapon.

Gikumpirma ni Senior Superintendent Ronald Dela Rosa, provincial police director, nga gipasa kaniya ang numero sa cellphone ni Mangudadatu human nitawag si Comelec Commissioner Lucelito Tagle, chairman sa committee on ban on firearms and security personnel, ug nagmando nga buhian sila gikan sa Matanao Police Station.

Nasuta sa mga otoridad niadtong higayona nga duha lang sa police escort ang nagbaton sa pagtugot og temporary security detail ug gipirmahan kini ni Lawyer Ray Sumalipao sa Armm Comelec.

Ang upat nga uniformed security details nailhang sila si Police Officer 3 Anuar Mangelen Musali sa President Quirino municipal police station, Police Officer 1 Joehali Panigas sa Central Mindanao PNP, Corporal Bernardo Patricio ug Private First Class Renante Alcalde sa 46th Infantry Battalion sa Philippine Army ang way gikapakitang dokumento sa dalang nilang M-16 armalite riffles niadtong higayona.

Si Lawyer Maria Febes Barlaan, nagkanayon sa Sun. Star Superbalita pinaagi sa telepono kagahapon sa buntag, nga nahitabo ang pag-kwestyon sa mga gwardiya ni Mangudadatu tungod kay wa dayon nila mapakita ang mga dokumento sa paghupot og daghang mga gwardiya ug mga armas.

"Na-release sila kasi later part of the day, naihatid na doon sa police station yung mga pertinent papers," sumala ni Barlaan.

Gikataho sab nga aprobado na sa Manila ang ilang aplikasyon sa pagdugang og gwardiya, pahayag sa kapulisan.

"In uniform naman sila, and besides Assemblyman Mangudadatu is not a candidate kasi sa Armm naman siya, kaya lang dahil sa risk ng kanilang life with what happened in Ampatuan town, so kailangan talaga nila ng maraming gwardiya," ni Barlaan.

Niani og mga pagsaway gikan sa pipila ka mga tawo human gidudahan nga gipaboran ang mga Mangudadatu apan hugot kining gilimod sa Comelec.

Gikanayon ni Barlaan nga wa lang nadala ang mga dokumento niadtong higayona apan daan na kining aprobado.

Sumala ni Barlaan nga ang susamang tratamento ila usab himuon sa ubang tawo.

"Kung may papel talaga sila na maipakita within the day, well wala yung problema basta ang importante hindi lang sibilyan kasi di talaga sila allowed magdala ng armas maliban sa mga security detail," panapos niini.

Si Mangudadatu mao ang manghod ni Buluan Vice-Mayor Esmael "Toto" Mangudadatu, nga ang asawa ug duha ka mga igsuong babaye, naapil sa pagpatay sa 57 ka mga tawo niadtong Nobyembre 23, didto sa Maguindanao. (Orlando B. Dinoy)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph