ANG kapulisan sa lungsod sa Kapalong, Davao del Norte, pormal nang nagpasaka og kasong murder batok sa suspek nga mitagod-tagod sa lawas sa usa ka lumad nga gipaanod ug napalgang patay sa may Kipaliko River, Purok 17, Barangay Sampao, lungsod sa Kapalong.

Sumala pa ni Police Chief Inspector Jimmy Palomar, hepe sa Kapalong Municipal Police Station, pormal na nilang gipasang-at ang kaso batok sa suspek sa pagpatay kang Udang Basong, lumad nga taga lungsod sa Talaingod.

Hinuon sa pagkakaron, dili pa mapagawas sa mga otoridad ang pangalan sa suspek aron dili mabulabog ang ilang tumong nga pagsikop niini.

Gipaabot na lamang sa kapulisan ang warrant of arrest gikan sa korte sa pagsikop sa suspek.

Gisulti sab ni Palomar nga panimalos ang nakitang motibo sa nahisgutang krimen.

Gipasalig sab sa kapulisan nga napulo ka adlaw gikan sa pagpagawas sa warrant of arrest, ilang sikupon ang suspek.

Si Palomar, miapela sab sa mga kabanay nga dili gayud manimalos sa kamatayon sa biktima pinaagi sa pangayaw.

Sulti ni Palomar nga itugyan na lamang sa mga kabanay ang pagkab-ot sa hustisya ngadto sa mga otoridad tungod kay ilang gihimo gayud ang tanan aron makab-ot ang hustisya sa kamatayon ni Basong. (Marvin Pineda)