GIBANABANA nga 50 ka pulis gikan sa Maguindanao ang gidestino sa Cotabato City Police Office.

Matud ni Cotabato City Philippine National Police (PNP) Director Senior Superintendent Willie Dangane nga 12 ka mga pulis gikan sa iyang buhatan ang gidala sab sa Maguindanao isip kabahin sa paglahugay sa puwersa sa PNP- Maguindanao.

Sumala ni Dangane nga iyang gipatambong sa refresher course ang mga pulis una ibutang sa ilang tagsa- tagsa ka mga trabaho.

Sumala ni Dangane nga wala kaayo naka-training ang mga pulis ug pag-escort lamang sa mga pulitiko ang gihimo samtang nadestino sa Maguindanao.

Ang mando aron i-deploy sa Cotabato City ang mga pulis gikan sa Maguindanao, naggikan mismo ni PNP Chief Director General Jesus Versoza.

Hangtud karon duna pay mga pulis sa Maguindanao nga padayong gi-imbestigahan gumikan sa katahap nga nalambigit sa niaging masaker nga mikutlo sa 62 ka mga kinabuhi, apil na ang 32 ka mga sakop sa local media sa Central Mindanao.

Dugang 402 oa ka mga armas ang gipangita sa PNP-Autonomous Region in Muslim Mindanao nga gi-isyo sa Maguindanao PNP nga hangtud karon wala pa mabalik sa ilang mother unit nga posibling gigamit sa mga Private Armed Groups sa pamilyang Ampatuan. (Edgardo Fuerzas)