NITANYAG ang Department of Justice (DOJ) niadtong maiging Biyernes, Septyembre 14, og ganti nga tunga sa milyon ka pesos alang ni bisan kinsa nga makahatag og impormasyon nga mosangpot sa pagkasikop sa Sugbuanong magpapatigayon nga si Peter Go Lim.
Nunot sa maong tanyag, si Justice Secretary Menardo Guevarra nipasidaan niadtong nagtago kang Lim nga mag-atubang silag kasong obstruction of justice kon magpadayon sila pagtabang kang Lim nga karon nahimo nang usa ka pinangita sa balaod.
Apan di kaha ulahi na ang tanyag sa DOJ sa paghatag og ganti sa pagkasikop ni Peter Lim? Ania pa kaha siya sa Pilipinas? Wa kaha siya mosibat human rakraki ang sakyanan sa iyang igsuon atubangan sa usa ka KTV bar dinhi sa syudad?
***
Ang Makati Regional Trial Court miluwat og usa ka orden de arresto batok kang lim niadtong Agusto 14 tungod sa kasong conspiracy to commit illegal drug trading ubos sa Republic Act 9165, ang Comprehensive Dangerous Drugs Act of 2002.
Gipasaka ang maong kaso batok ni Lim sa Philippine National Police-Criminal Investigation and Detection Group subay sa pamahayag ni Kerwin Espinosa, usa ka confessed drug trader sa Central ug Eastern Visayas, nga si Lim mao ang ilang drug supplier, butang nga gihimakak sa makadaghan ka higayon ni Lim.
Ang korte niluwat usab og usa ka hold departure order batok kang Lim aron pagpugon kaniya sa pagbiya sa nasod. Pero unsay mahimo sa hold departure order kon nakalarga na si Lim?
***
Usa ka KTV bar, ang Infinity KTV and Music Lounge sa Archbishop Reyes Ave., syudad sa Sugbo, nga gituohang gipanag-iya ni Peter Lim, nanira na ug ibaligya usa ka buwan human ipahibalo nga ubos na kini sa bag-ong tag-iya.
Niadtong buwan sa Marso, usa ka security guard ang napusilan ug napatay atol sa pagrakrak sa sakyanan sa igsuon ni Peter Lim. Niadtong Hunyo, tulo ka mga tawo misuway sa pagsunog niini. Sa miaging semana dunay nilabay og nomba pero wa makabuto.
Pipila lang ka adlaw ang milabay, nitunga ang mga alegasyon nga mga menos de edad ang ilang mga GRO.