ANG abogado sa labing impluwensiyadong politiko sa lalawigan sa Maguindanao nanawagan sa Philippine National Police (PNP), Armed Forces of the Philippines (AFP) ug Comission on Elections (Comelec) nga himuong patas ang pagtratar sa banay sa duha ka mga nagbanging pamilya nga mao ang Ampatuan ug Mangudadatu.
"Ako po ay nanawagan sa ating gobyerno na gawing patas ang treatment nila sa pamilya ng aming clients (Ampatuan) at Mangudadatu. Kami po ay nag-request sa police at military ng security personnel pero hanggang ngayon ay walang dumating para magbantay sana sa mga babaeng naiwan sa mansion ng mga Ampatuans," suma ni Lawyer Philip Pantojan sa gihimong press conference niadtong Dominggo didto sa Grand Menseng Hotel.
Ang pamahayag sa maong abogado miguwa human niya nasuta nga misobra ang security personnel ni Autonomous Region in Muslim Mindanao (Armm) Assemblyman Kadafeh Mangudadatu kinsa nasikop sa checkpoint didto sa Km. 71, Barangay Sinawilan, Matanao, Davao del Sur niadtong Biyernes.
Mga alas 10:35 sa buntag gipahunong sa kapulisan ang duha ka mga sakyanan, kolor itom nga Chevrolet ug kolor itom nga Toyota Hi-lux, human giingon nga wala kini mihunong sa unang checkpoint didto sa dakbayan sa Digos.
Nasuta nga lulan sa maong convoy si Mangudadatu ug mga bodyguards nga sila si Police Officer 3 Anuar Mangelen, na-destino sa President Quirino, Sultan Kudarat, Police Officer 1 Joehali Panigas, sakop sa Buluan Police Station sa Maguindanao, Corporal Bernardo Patricio ug Private First Class Renante Alcalde, pulos sakop sa 46th Infantry Battalion, 8th Infantry Division sa Philippine Army.
Niadtong Dominggo, gikumpirma ni Davao del Sur Police provincial director Senior Superintendent Ronald Dela Rosa nga ila gibuhian ang mga security personnel human gitawgan sila ni Commissioner Lucelito Tagle, chairman sa committee on the ban on firearms and security personnel sa Comelec.
"Dili na sila makasuhan kay nitawag si Commissioner Tagle nga approved na daw ang application nila for additional security detail. So, iyang gipa-release," suma ni Dela Rosa sa Superbalita.
Tungod sa maong katikaran, miatubang si Pantojan sa media aron iyang ipasibaw ang ilang mulo bahin sa maong hitabo.
"How do we know na itong tumawag kay Dela Rosa ay talagang si Commissioner Tagle? How do we know na sila ay talagang may permit galing sa Comelec? Diri na ko nasuko. This makes my blood boils," pahayag ni Pantojan.
Gipangatarungan sa maong abogado nga dili patas ang gihimo sa gobyerno sa duha ka nagbangi nga pamilya sanglit nakalingkawas si Mangudadatu sa iyang kalapasan sa Comelec Gun Ban.
"They should follow the rule of law. Itong client nga namin ay nagsasabi na sundin namin ang proseso ng batas," pahayag ni Pantojan.
Si Mangudadatu nagbutyag sa mga tigbalita nga dili tinuod nga wala sila mihunong sa checkpoint didto sa Digos sanglit alang niya di sila masinupakon sa balaod.
Ang assemblyman giingon nga gikan niadtong higayona sa Manila human personal nga gi-monitor ang dagan sa kaso batok sa mga Ampatuan kinsa maoy gitudlong utok sa pagpatay sa 57 ka mga tawo, lakip ang kabanay niini ug mga sakop sa media didto sa Ampatuan, Maguindanao niadtong Nobyembre 23, 2009. (AD)