DILI dali isalikway kining pangagpas nga gisabotahi sa mga negosyanting kaalyado sa Liberal Party kining kakuwangon sa bugas karon.
Basi sa huhungihong gipangtagoan ang mga bugas aron mominus ang suplay ug mohamal ang presyo niini.
Tumong sa kalihukan mao ang pagpainit sa katawhan aron moalsa sila batok sa administrasiyon ni Presidenti Duterte.
Duna nay pipila ka mga bodega ang natultolan sa gobiyerno. Namatud-an nga gipangtagoan tuod ang mga bugas.
Dali ra baya mahibaw-an kon duna ba gyoy pagnihit sa bugas. Masubay kana sa talaan sa gobiyerno sa ilang imported rice ug sa kinatibuk-ang produkto sa usa ka lalawigan sama pananglit sa Bukidnon.
Unya itandi kana sa normal nga konsumo sa maong dapit kon pila ka sakong bugas ang mahurot sa katawhan matag bulan.
Sa dili madugay mabisto ra kining tanan kon hinimuan ba kini sa administrasiyon ni Duterte, nagpasabot nga palpak ang ilang programa o duna gyoy lakang sa pagsabotahi.
Pagkakaron, duna may mga paagi hinuon pag-alkontra niining kakuwang sa suplay sa bugas.
Mangita ta og alternatibo nga pagkaon o hulip sa bugas. Lisod kini buhaton apan paagi kini nga makapalahutay nato bisan hingpit nang mawa kining bugas. Unsa man kini?
Una sa tanan, angay nato masayran nga kining white rice nga sagad natong gigamit gamay ra gyud kini og sustansiya, dili kaayo makahatag og kahimsog sa panglawas kay puno kini sa starch.
Kon maproseso kining starch sa atong lawas mahimo kining sugar. Mao bitaw daghan kaayong mga tawo gipang-diabetes tungod sa sobrang pagkaon og puti nga bugas.
Duna bay laing makaon nato gawas sa white rice? Daghan.
Kining brown rice, kamote, kamoteng kahoy, patatas, mais, quinoa, barley ug bisan na gani kining cauliflower. Mas healthy kining klase sa pagkaon kon itandi nato sa white rice.
Ang problema man gud karon mao nga gipasuwabi nato unsay gusto sa atong dila kon lami ba o dili. Wa nato paminawa ang gusto sa atong lawas kon makahimsog ba o dili.
Kon dili lang gyud nato nuntan atong appetite, di gyud ta magka-problema bisan hutdon pa og tago nila ang bugas.
Kay sa tinuod, mabuhi baya ta kon mokaon lang og utanon ug prutas unya gamayng isda o karne.
Usa pa sa dakong problema karon mao kining pagpalayo nato sa Ginoo.
Kay kon nasayod ta sa pagtulon-an nga kining atong lawas gilukat ni Hesu-Kristo pinaagi sa pag-ula sa iyang dugo sa Kalbaryo, nan, dili na kita maoy tag-iya sa atong lawas.
Tinugyanan lamang kita ug wa tay katungod sa pagpasipala sa atong lawas pinaagi sa pagkonsumo og mga pagkaon nga makadaot sa atong lawas.
Usahay man gud o sagad gyud mahitabo mao nga kinahanglan busgon pag-ayo nato atong tiyan. Mokaon gyud ta og daghang kan-on hangtod manug-ab.
Gikinahanglan gyud nato kining gitawag og “temperance” o pagpungog.
Pagpugong sa pagkaon, nagpasabot dili sobra ba, unya pagpugong pud paggasto o bisan sa panultihon – dili kay moreak dayon ta ug basulon ang administrasiyon sa problema sa kakuwang og bugas. Mao na diha!