NAPALGAN ang usa ka langyaw nga wala nay kinabuhi sulod sa gi-abangang apartment niadtong Lunes, Septyembre 17, alas 7:00 sa buntag sa Kalambagohan Street ning dakbayan sa Cagayan de Oro.
Naila ang namatay nga si Ronald Van Orden, 76, ulitawo, usa ka US citizen ug residente sa United States apan kasamtangang nag-abang sa dapit mga duha pa ka semana human kini lakip sa nabiktima sa sunog nga miigo sa Barangay Gusa ning dakbayan.
Matud sa higala sa langyaw nga si Mary Ann (bansagon gitago), 32 anyos, minyo ug residente sa Barangay Gusa ning dakbayan kinsa gikan pa sa Australia nga iya untang i-surprisa ang higala apan nakurat na lang kini nga walay kinabuhi si Orden nga iyang naabtan.
“Mag-meet unta mi alas 7:00, nagsige ko og tawag wala gyud siya mi-respond, open daan ang door,” pahayag ni Mary Ann.
Nagbuy-od ang biktima sa iyang katre diin ang iyang katunga sa lawas lamang ang naghigda. Giingong aduna na kini gihambing nga sakit sa panglawas gani niwang na kini kon tan-awon.
Sa pagsulat niini nga balita nagpaabot pa ang kapolisan sa tinugyanan sa Scene of the Crime Operatives (Soco) kinsa nagsusi sa patayng lawas sa biktima aron masuta ang hinungdan sa kamatayon niini.