PATAY ang usa ka lalaki human kini giingong misukol sa kapolisan atol sa gipahigayong drug bust operation niadtong Sabado, Septiyembre 15, sa gabii sa Sitio Cala-cala, Macasandig ning dakbayan sa Cagayan de Oro.
Ang napatay naila nga si Arnel Patricia alyas Bolantoy, 31, residente sa Barangay Carmen ning dakbayan ug usa ka sakop sa Batang Mindanao (BM) 29.
Matud ni Police Senior Inspector Mario Mantala, hepe sa Police Station 9 (PS9) sa Macasandig nga unang nagpabuto si Patricia diin naigo ang usa sa mga sakyanan sa operatiba hinungdan nga napugos sila sa pagbalos og pusil.
Nakuha gikan kang Patricia ang Magnum 22, buhing bala, granada lakip na usab ang tulo ka pekete sa iligal nga druga ug drug bust money.
Dugay na nga gibantayan ang lihok sa suspek gumikan sa iligal nga kalihokan niini.
Sa pagsulat niini nga balita ang patay nga lawas anaa na sa Bollozos Funeral Homes sa Bulua ning dakbayan.