DAKO nga kawad-an sa probinsya sa Misamis Oriental ang pagbiya ni Department of Interior of Local Government Provincial Director Eduardo Bhagwani.
Kini ang pamahayag ni Misamis Oriental Governor Yevgeny Vincente Emano atol sa flag raising sa Kapitolyo Probinsyal diin gihatagan sab og pasidungog si Bhagwani.
Dugang sa gobernador unta matupngan ug maapsan sa mohulip sa biyaan nga position ni Bhagwani ang iyang pamunoan kini human nga ubos sa liderato ni Bhagwani nakab-ot sa lalawigan ang back to back nga Seal of Good Local Governance (SGLG).
Apan nalipay siya nga sa pagbiya niini mosaka kini ngadto sa taas nga posisyon ug malaumon nga makabalik kini dinhi sa rehiyon.
Karong Septiyembre 24 pormal mobiya sa DILG sa Misamis Oriental si Bhagwani apan wala pay gideklarar kon kinsa ang mohulip niini.
Gikareport nga sa pagka promote niini magsilbi kini nga Assistant Regional Director sa Zamboanga Peninsula, lalawigan sa Zamboanga.