NAPILI nga research site sa mga tinun-ang doktor gikan sa Ateneo School of Medicine and Public Health (ASMPH) sa Ateneo de Manila University ang Misamis Oriental.
Gibutyag ni Jocelyn Tagarao, ang nurse ug mental health coordinator sa Provincial Health Office nga usa ang Misamis Oriental sa ilang napiling kuhaan og pagtuon kalabot sa Mental Health in the Philippines: Perception delivery diin buot nilang masayran ang health system sa probinsya labina sa mental health nga aspeto.
Ang lungsod sa Balingasag, dakbayan sa Gingoog ug Naawan ang usa sa napiling mga research site niining mga tinun-ang doctor.
Niadtong Septiyembre 11 adunay gipahigayon nga focus group discussion diin tumong niini mao ang paghatag og orientation sa research team ug paghatag diskusyon sa mga makolektang datos ug ingon man mga referral mechanism.
Matud ni Tagarao nga dako iyang pagtuo nganong napili ang probinsya nga research site tungod sa suporta nga nahatag ni Governor Bambi Emano kinsa nagsuportahan sa programa sa mental health sa lalawigan, lakip mga tambal ug uban pa alang niadtong mga nalisoan sa pangisip.