ARON mas makapokos sa buhatan sa Provincial Veterinary Officer gihulipan si Dr. Benjamin Resma kinsa head usab sa Provincial Agriculture Office.
Mipaabot sa iyang dakong pasalamat si Misamis Oriental Governor Yevgeny Vincente Emano sa serbisyo nga nahatag ni Resma ngadto sa katawhan sa lalawigan samtang nangatungdanan isip Provincial Agriculture Officer ug Provincial Veterinary Officer sa dugay na nga higayon.
Matud sa gobernador nga bisan og duha ka departamento ang gihawiran niini apan wala kini makadungog og reklamo ug gani nakadawat pa kini og mga national nga award.
Lakip sa iyang pasalamat mao ang paghatag og kahigayonan sa mga mga mag-uuma nga maka-display sa Kapitolyo matag adlawng Biyernes pinaagi sa Farmer’s Market nga mikita na og P7 milyon sulod sa 30 kapin ka semana sukad kini gisugdan.
Gi-turn over ni Resma ang iyang pangatungdanan isip PAGRO officer ngadto sa iyang overseer nga si Jose Apollo Pacamalan.
Hangyo ni Emano sa pamunoan karon ni Pacamalan nga unta dili lang tupngan niini ang nabuhat ni Resma apan apan labwan pa.
Gihagit usab sa gobernador si Pacamalan sa iyang pamunoan ilabi na nga adunay gakadawat nga mga report nga adunay nagtinguha nga mo resign sa trabaho human nila masayran nga si Pacamalan ang mohulip kang Resma tungod sa ka istrikto niini.
Apan walay nakita nga problema si Emano niini sanglit nagtuo kini nga usa kini sa hiyas aron makahatag og maayong serbisyo ug mapalambo pa ang ilang buhatan.