SI Gob. Hilario Davide III makigtagbo karon sa mga opisyal sa Department of Trade and Industry (DTI) ug pag-activate sa Local Price Coordinating Council aron pagtuki sa padayong pagsaka sa presyo sa mga nag-unang palaliton.
Niapelar sab ang gobernador sa mga bus company, ilabi na sa operator sa Ceres Liner, nga dili lang una ipatuman ang usbaw sa plitihan kay naglisud ang mga konsumidor ug mga commuter.
Kon apektado na ang mga ordinaryong konsumidor sa pagsulbong sa presyo sa mga batakang palaliton, giangkon sa gobernador nga apektado na usab niini ang kagamhanan sa lalawigan sa Sugbo.
Gani matod niya, nga ang executive department sa Kapitolyo mangayo na unya ug mas dakong budget alang sa tuig 2019.
Sigun sa gobernador, nisaka na ang presyo sa mga materyales ug uban pang items alang sa mga gipatuman nga proyekto ug programa sa provincial government.
Giklaro ni Davide nga ang pagpangayo unya nila ug mas taas nga gahin sa sunod tuig, walay kalabutan sa umaabot nga piniliay sa Mayo.
Karong adlawa, gitakda nga i-convene ni Davide ang Local Price Coordinating Council kauban ang DTI.
Gusto sa gobernador nga mapangitaan ug solusyon ang pagsaka sa persyo sa mga palaliton, nga nakaapekto na usab sa mga ordinaryong Sugbuanon.
Subay gihapon niini, nanawagan ang gobernador sa operator Ceres Liner nga mao ang Vallacar Transport, nga undangon lang una ang pagpaningil nila ug dugang P5 sa naandan nga plitehan sa bus.
Sa nasayran, gisugdan ug patuman sa Ceres ang pagpaningil sa usbaw sa plitehan niadtong Biyernes sa miaging semana.
Subay gihapon kini sa nagkamahal nga presyo sa krudo ug maintenance sa ilang mga sakyanan ug ubang pang galastohan. AZLG