FREEDOM. Niadtong Dominggo opisyal nga giablihan ug gisugdan ang ika-26 nga Cebu Press Freedom Week nga pagaselebrahon matag ika-tulo nga semana sa buwan sa Septiyembre nga masulod usab ang 21, ang petsa sa pagdeklarar ni kanhi presidente Ferdinand Marcos sa Martial Law niadtong 1972.
Ang mensahe ni Auxuliary Bishop Dennis Villarojo, nga maoy nangulo sa misa sa selebrsayon, atol sa iyang homily, maundanon kay iyang gihisgutan kon unsa kagawasnon ang prensa o media kon patay na ang konsensya ug mawala na ang kamatuoran.
Pung pa ni Msgr. Villorojo ngadto sa taga media atol sa iyang sermon nga “Ang katawhan motuo sa inyong isulti. Duna moy kredibilidad. Kasaligan mo.” The truth, the basis of your power. It’s not a possession held in the palm of your hand. You do not make the truth. You are only witnesses of the truth as it unfolds,” dugang pa ni Bishop Villarojo.
Ang buot ipasabot ni Bishop Villorojo nga kitang naa sa media dili maghimo-himo og storya kay ang gahum sa media naa magbasi sa kamaturoan o kon unsay tinuod. Ang kamatuoran dili na iya sa taga media kay ang taga media mga testigos lamang sa mga panghitabo ug igo ra mohatud sa istorya.
Sa akong mubo nga pagsabot sa mensahe ni Msgr. Villarojo nga ang trabaho sa media ngan nga tighatud sa katawhan sa inadlaw nga mga panghitabo dili rason nga ang taga media mahimo nga poderoso na kaayo. Pung pa ni Msgr. Villorojo sa eninglis “when conscience is dead, truth becomes a widow.” (Kong patay na ang konsensya, mabiyuda na ang kamatuoran).
Duna say naigo sa mensahe ni Msgr. Villarojo labina kadtong mga sakop sa media o “comedia” lakip na ang nga mga naa sa gobyerno nga kusog mobunal sa ilang kontra ug mogamit og mga pung nga dili tawhanon. “By a barrage of profanity, one can bully somebody into submission and acquiescence,” pung pa ni Msgr. Villarojo.
Dili lang panginabuhian ang panarbaho sa media apan duna say dakong responsibilidad nga gisang-at sa ilang mga abaga ang pagtug-an o hisgot sa tinuod nga panghitabo ug dili ang ginama lang sama sa kanang giingon nga fake news. Ning panahon karon sa social media daghan na usab ang fake news nga kitang katawhan angayan usab nga magbantay ug dili dayon motuo.
Manghinaut ta nga ang mensahe ni Msgr. Villarojo motuhop dili lang sa atong mga kauban sa media apan lakip na kadtong mga tawo nga naghupot og poder nga naa sa kagamhanan tungod kay ang paghatud sa kamatuoran di lang na iya sa media, iya sad na sa tinubdan sa storya ang paghatag sa husto ug sakto nga impormasyon.