MITUKAR na pod ang bulibol aning ‘kanhi laos nga pulitiko’. Iyang gihinginlan ang Land Transportation Office (LTO 7) sa nahimutangan niini karon diha sa Natalio Bacalso Avenue kansang lote gipanag-iya sa kagamhanan sa dakbayan sa Sugbo. Kini human nagkalalis na usab sila ni LTO 7 Regional Director Victor Caindec. Iya nang gipadad-an og notice to vacate si Caindec sulod sa 30 ka adlaw. Kon dili kini mopahawa ang Probe Team sa City Hall ang mo-demolish niini.
Ang iyang pangangkon kay iyang himuon nga extension sa bag-ong Cebu City Medical Center (CCMC). Sus, wala pa gani mahuman ang CCMC, naghisgot na og extension. Nagka-away na usab ang “kanhi laos nga pulitiko” ug si Caindec human sa daghang mga reklamo nga nadawat ang City Hall sa kalangan sa pag-release sa LTO sa mga plate numbers.
Unya mibahad ang LTO nga ilang dakpon ang mga sakyanan ug motorsiklo nga walay bag-o o original nga plate numbers ug registration diin P12 mil ang multa. Ambot og nganong langan ang registration labi pa sa mga motorsiklo sa LTO. Ang LTO mi-release na og mga plate numbers gikan sa July 2016 hangtod sa February 2017. Anaa na kini sa ilang buhatan ug sa mga car dealers. Apan ang bag-ong namalit og mga sakyanan wala pa. Busa maka-rason ang mga tag-iya.
Gumikan ning maong mga reklamo ug sa kabug-at sa multa, mirebenta ang “kanhi laos nga pulitiko.” Ug mitubag usab si Caindec. Ikaduha na nila kining tinubagay. Misukol usab si Caindec kay aduna may gisandigan nga mao si Presidential Assistant for the Visayas Michael Dino. Actually, proxy war ni. Away gihapon sa “kanhi laos nga pulitiko” ug ni Dino.
Nagbinata man ning mayor sa Cebu City. Pagkamabaw rag rason nga iyang papahawaon ug hinginlan ang LTO sa maong lugar. Dugay na ang maong ahensiya diha unya karon ra niya papahawon. Mora man og siyay tag-iya sa maong lugar ug sa entiro Sugbo. Iya pod untang papahawa-on ang fire department diha kay mao ra man nang yutaa. Ingon ana na siyag batasan. Dili makaon og iro. Morag diktador. (bobbygnalzaro@gmail.com)