ANG mga pre-millennial dili makalimot sa petsa nga Septyembre 21. Maka-relate niini ang mga sakop sa First Quarter Storm nga maoy unang biktima sa Presidential Decree 1081 ni kanhing Presidente Ferdinand Edralin Marcos.
Niining adlawa, opisyal nga gideklara ni Marcos ang martiallaw tungod kuno sa dakong hadla sa seguridad gikan sa mga komunista ug aktibista nga nagpahigayon kuno og pagpamomba pinaagi sa ilang "Light a Fire Movement" ug ang pagbanhig ni Defense Secretary Juan Ponce Enrile.
Gipahid ngadto sa komunista ang paglabay og duha ka granada atol sa miting de avance sa Liberal Party (LP) sa Plaza Miranda nga nakapatay ug nagsamad sa daghan nga kandidato ug sibilyan.
Gilimod kini sa grupong komunista samtang gipasanginlan sa LP si Marcos ug ang iyang Nacionalista Party nga maoy utok sa pagpamomba aron madayon ang iyang planong magpabilin sa puwesto human ang iyang termino pagka-presidente.
Ang unang malampusong kudeta batok sa naglingkod nga presidente mao ang Edsa People Power Revolt niadtong 1986 nga nagbutang sa biyuda ni kanhing Senador Benigno "Ninoy" Aquino sa Malacanang nga si President Cory Aquino.
Human niini, daghan na kaayong kudeta nga nahitabo batok sa mga misunod nga administrasyon ni PCory, PErap ug PGMA. Gawas kang Marcos ug Erap Estrada, walay nagmalampuson nga ubang kudeta tungod kay naay mga elemento o rekado nga kulang.
Sa akong pagpaniid sa mga nilabay'ng kudeta, kinahanglang anaa kining mga rekado aron madayon: suporta sa armadong puwersa, pagpaluyo sa katawhan o sibilyan, pagpaluyo sa simbahan, dayag nga suporta sa United States of America, ug ang katapusan mao ang kabug-aton o kamatarunganon sa isyu nga gipakigbisogan sa mga nagkudeta.
Nagkulang niini ang kudeta ni Senador Gringo Honasan batok kang PCory ug ang duha ka kudeta ni Senador Antonio "Sonny" Trillanes.
Makalimbawot lang sa balahibo nga dako ang papel sa US sa panghitabo sa politika sa Pilipinas ug sa daghan pang nasud sa kalibutan.
Usa kini sa mga hinungdan nganong init ang dugo ni President Duterte sa US ug ang pag-alig-alig niini nga mahimong pulis sa kalibutan.
Di niya makalimtan ug iyang gibalik-balik sa mga pakigpulong ang pagbastos sa mga ahente sa CIA o FBI sa lokal nga kagamhanan sa Davao sa ilang pagluwas gikan sa hospital kang Mr. Mearing, usa ka American citizen nga naunay sa iyang gigama nga bomba sa usa ka hotel sa dalang Uyanguren.
Si PRody maoy mayor sa Davao niadtong tungora.
Sa administrasyon karon ni PRody, makompleto kaha sa iyang kontra ang tanang rekado sa usa ka malampusong kudeta?
Sa ikatulo ka tuig sa iyang paglingkod sa Malacanang midaghan na ang iyang kontra.
Madayon kaha ang bag-ong kudeta?