SUNOD buwan ang gitakda sa Comelec nga panahon sa pag-file sa kandidatura sa nangambisyon nga magpapili sa 2019 eleksiyon.
Ang Liberal Party (LP) nakahunahuna sa pagpalangsad kuno sa mga popular nga mga artista ug singer sa senado sama nilang Dingdong Dantes, Agot Isidro, Jim Paredes ug Leah Navarro.
Si bisan kinsa makadagan basta kahibawo lang mosuwat ug mobasa suma sa atong konstitusyon. Busa way makapugong kon molangsad kining mga artista.
Ang mga artista ug mediamen may dakong purohan nga modaog tungod sa ilang ngalan ug kabantog. Sama nilang kanhi Senador Lito Lapid, Eddie Ilarde (Psk). Orlando Mercado, Tito Sotto ug Joseph Estrada.
Makabintaha ni sila sa uban kay ilado. Gamay na lang ang igasto sa propaganda (TV & radio ads, tarpulins, etc.). Apan nagkinahanglan gihapog logistics.
Suwayg langsad karon nga way kuwarta mamunbon ka. Arang-arang lang ning national positions kay way palitay, apan mohatag ka gyud sa imong major campaigners.
Matod pa, kadaghanan sa mga artista basiyo ang utok, apan wa tay mahimo kon pillion sa katawhan. Duna may mga artista nga may agi sama ni Kongresista Vilma Santos.
Gibabagan unta sa atong batakang balaod ang pagdagsang ning way alamag nga mga kandidato pinaagi sa hustong kwalipikasyon nga angay sundon.
Kining makamao lang mosuwat ug mobasa gud gisunod nato sa Estados Unidos nga konstitusyon. Niadto sa Amerika mga mugbog grado ang karaang mga lider.
Gani, kadto si George Washington kinsa nahimong unang pangulo sa Estados Unidos grade school lang apan maoy nakapadaog sa rebolusyon batok England sa 17th century.
Ingon unta sa Qualification Standard (QS} sa Civil Service nga way kawani nga matudlo kon di makaabot sa QS nga gikinahanglan sa usa ka katungdanan.
Duna untay QS gikan sa brgy kapitan ngadto sa pamuno nasod. Tan-awa karon daghang mga napiling opisyal sa barangay ug lungsod nga nagduhiraw lang kay kuwag grado. Pastilan!