SA AMONG Fiscal Management nga subject sa Political Science, init namong gihisgutan ang budget sa gobyerno.
Among gihisgutan ang importansya sa taxes ug budget sa administrasyon ni Pangulong Rodrigo Duterte.
Sa among diskusyon, gipasabot namo ang teyorya ug prinsipyo nga sundon alang sa maayong paggahin og pundo alang mga proyekto.
Amo sab nga gituki ang budget sa matag ahensya sa gobyerno, amoa kining gihisgutan sa tunghaan, gumikan kay init sab kini nga diskusyon sa mga kongresista sa Kongreso.
Giingon sa deleberasyon sa Kongreso nga nagkainitay sila Davao First District Rep. Karlo Nograles ug House Majority Floor Leader Rolando Andaya, Jr.
Subay sa report, ang sinugdanan sa ilang siningkahay mao ang pagkibhang sa P55 bilyones nga budget sa pork barrel fund sa mga kongresista.
Mga kasaligan nga tinubdan nagkanayon nga gikwestyon ni Nograles, chairperson sa committe on appropriations, ang pagdumili niini sa pagpirma sa committee report nga di siya ang naghimo.
Kini ang hinungdan nga misinggit sab si Andaya ngadto kaniya ug miguwa ang espekulasyon nga hulipan si Nograles isip tsirman sa komitiba.
Dinhi na miguwa ang kamatuoran nga aduna pa gihapoy pork barrel ang mga kongresista tungod kay sa tinubagay sa duha ka mga kongresista, gipangutana ni Nograles si Andaya kung unsa nga mga distrito ang apektado sa pagkibhang sa budget.
Apan giingon sa mga magbabalaod nga walay pork barrel fund ang P3.757-trillion 2019 national budget nga gihisgutan karon sa Kongreso.
Kon tugotan nato nga wala silay pork barrel, mosugot kaha kining mga tang-an na sa politka nga wa silay madawdaw sa mga proyekto nga maoy ilang naandan sukad pa kaniadto?