COMPOSTELA, Comval Province -- Patay ang usa ka lalaki samtang naospital ang iyang kainom human sila gipusil sa wala mailhing mamumuno sa Purok 7, Barangay Poblacion, alas 10 sa gabii, Dominggo, Septyembre 16.
Mga biktima giila nga si Vergo Jay Amora, ug Masumpad Fabian Jr. parehong nagpuyo sa Purok 12, Barangay Poblacion, Compostela.
Ang imbestigasyon sa Compostela Municipal Police Station, nagkanayon nga mga biktima nag-inom sa ilimnong makahubog gawas sa usa ka balay dihang miabot ang wala mailhing mamumuno.
Walay daghang istorya, gipusil sa suspek si Amora tumong sa nagkadaiyang bahin sa lawas. Samtang naigo sa saag nga bala si Fabian Jr., sa walang tiil.
Ang suspek paspas nga misibat paingon sa wala matinong lugar.
Mga biktima pulos gisapupo ug gidala ngadto sa ospital apan gideklara nga dead on arrival si Vergo Jay F. Amora.
Hangtud sa pagsuwat niining balita, wala pay natumbok nga suspek ang kapulisan busa nagpadayon pa ang ilang imbestigasyon. (Rockyben S. Catisay)