MATANAO, Davao del Sur -- Gipahimangnoan sa kapulisan ang mga netizen nga di magpataka og post sa ilang social media account ilabi na kon makapaukay sa publiko.
Giklaro ni Senior Inspector Renato Uy, hepe sa Matanao Municipal Police Station, nga walay kamatuoran ang gi-post sa usa ka netizen sa iyang Facebook account nga aduna silay nadakpan nga nagdala og bomba niadtong Lunes sa udto, Septiyembre 17.
Matud sa netizen nga “maayo na lang nadakpan sa mga pulis ang usa ka lalaking nagdala og bomba padung sa Bansalan kaganina.”
Si Uy nga nagsaulog sab sa iyang adlaw'ng natawhan Martes, nagbutyag nga way kamatuoran ang maong taho ug di angay i-share sa uban.
Ang lungsod sa Bansalan sa probinsiya nagsaulog sa iyang ika-66 nga kamugnaan isip lungsod kagahapong adlawa.
Samtang, gipasidan-an sa kapulisan ang publiko nga maglikay sa paghimo og fake news sanglit aduna kini multa subay sa Republic Act 10591.
“Under the law, penalty of arresto mayor and a fine ranging from P40,000 to P200,000 shall be imposed on any person publishing false news, which may endanger the public order, or cause damage to the interest or credit of the state,” matud sa nalatid sa balaod. (Orlando B. Dinoy)