POSIBLE nga dunay kamatuoran ang obserbasyon sa kapulisan nga pipila ka mga kaso sa serye sa pagpamatay sa Sugbo resulta sa away sa mga sindikato sa gidiling drugas human napiit ang ilang operasyon tungod sa mas gihigpitan nga kampanya sa kagamhanan sa gubat batok sa pagpayuhot sa gidiling druga sa nasod.
Kini gibutyag ni PSSupt Julian Entoma, direktor sa Mandaue City Police Office (MCPO) human sa iyang pakig-alayon sa mga tigpaniid sa Police Regional Office (PRO) 7 dihang nabungkag ang Perojinog group sa Ozamis ug namalhin sa laing dapit.
Ug nakompirmar sa kapulisan tungod sa pagkapatay sa mga sakop sa security team ni Ozamis City Vice Mayor Nova Princess Parojinog nga naa sa drug waltchlist sa Ozamis police, kinsa gipusil-patay sa wala mailhing mamumuno sa Barangay Cubacub, dakbayan sa Mandaue niadtong Dominggo sa gabii.
Ang duha ka mga biktima naila pinaagi sa ilang voter’s identification card nga sila si Mark Lester Castillo, 40, lumad nga taga Purok 3, Baybay San Roque, Ozamis City ug Renan Mabida, 35. Ang duha kasamtangang napuyo sa Purok 2 sa Barangay Cubacub, Mandaue.
Dunay nag-unang mga kaso sa pagpamsil-patay sa Mandaue ug dakbayan sa Sugbo nga gidudahan sa kapulisan nga tungod sa bangi sa sekreto nga grupo, walay saktong remittance sa ilang sa halin sa druga o pagkasilo sa laing grupo nga dunay nangilog sa ilang area sa operasyon sa drugas.
Pipila sa nadakpan usab sa drug raid sa Talisay nasubay gikan sa Ozamis, ang dakbayan nga naguhayguhay ang kadungganan tungod sa pagbasi sa dautang elemento sa dapit sama sa drugas, dinagkong tulis ug kidnap-for-ransom.
Kinsa ang laing grupo sa Sugbo nga nakabangga sa Parojinog group? Hanap kini nga bahin sa taho sa kapulisan o ilang gitagoan una nga kasayoran. Hinuon, maayong sindikato ang mag-unay, pwera mapagan ang enosenteng sibilyan o awtoridad.