ANG LDR o Long Distance Relationship dili lang alang sa mga aduna’y relasyon nga romantic, gawas sa pamilya, mamahimo usab kini sa mga higala nga nagkalagyo tungod kay kinahanglan nga molambo pa sa ilang pagtungha, career, o gusto pa nga mo-explore sa laing lugar. Daghan na siguro ang maka-relate niini hilabi na og suod kaayo nimo ang higala.
Bisan paman nga gusto nato nga pareho gihapon ang kaniadto apan aduna gyuy kausaban. Ayaw huna-hunaa nga tungod kay malagyo na mo, humanon na usab ninyo ang inyong friendship.
Ania’y pipila ka mga reminder aron magpabilin ang nga intact ang inyong friendship.
Komunikasyon gihapon ang solusyon
Kon inyong friendship kanang di kaayo mag-estorya o magkita apan kon makahigayon dugay sab kaayo mahuman, maayo.
Apan kini tungod na sa lawom na usab kaayo nga panaghigalaay diin dili na kini matarog bisan paman og naay libak nga madunggan.
Giunsa mani ba? Pinaagi sa komunikasyon ug kining abli mo sa usag-usa.
Wala usab kini nagpasbaot nga tanan nalang imong gihimo taga adlaw isulti nimo niya.
Ang friendship nga lawom na kaayo, dili nana “I’m Fine” ang tubag apan mas molawom nana kay makasabot na sa usag-usa.
Mamahimo ra na sila nga estranghero kon pasagdan usab nimo.
Pag-schedule mo
Bisan paman og di magkatugma inyong nagkadaiyang schedule o time difference apan pangita mo og paagi nga mahimo ninyong magkaestorya o magkakita gihapon mo.
Dili man kinahanglan nga molungtad og usa o duha ka oras ang estorya ba, apan depende hinuon na kon pila na mo ka adlaw, semana, o buwan nga wala na magkita, kay daghan na kaayog chika.
Ang friendship, mura na siyang romantic relationship apan wala to’ng mga part sa kiss-kiss ug uban pa.
Likayi usab ang pagsigeg tan-aw sa imong social media sites kon nag-estorya, mas maayo wala’y cellphone para focus.
Pahibaw-a sila nga gihuna-huna nimo sila
Gawas anang makig-estorya ka nila, daghan pa usab ang mamahimo nimong mabuhat aron mapa-feel nila nga nag-care ka.
Tungod usab sa social media, mamahimo na nga ma-tag nimo siya sa mga weird, lingaw nga hulagway o mga videos ninyo kaniadto o kanang makahinumdom ka niya.
Mamahimo usab nga imoha kining i-tag sa comment section.
At bakit hindi? Niining paagiha, gawas sa ma-feel niya nga nakahinumdom ka niya, pareha mong duha nga mangatawa.
Pasalamat ta’s makabag-o nga teknolohiya!
Paninguhaa ninyo nga magkakita o makabisita mo sa usag-usa
Gawas sa magkakita mo, kon lagyo mo ug mobisita ka, mamahimo nimo nga makita ang bag-ong environment sa imong higala, ug kon kinsa ang iyang bag-ong mga higala.
Kon mamahimo man diay, permiha kini ninyo.
Maayo usab nga magplano mo og bakasyon aron aduna mo’y memories.
(Nigawas sa SunStar Cebu niadtong Hulyo 23, 2018)