GIPATAWAG sa Cebu City Government ang mga cell site provider aron atimanon ug hatagan og kasulbaran ang kahinay ug kakuwang sa cellphone signal sa mga barangay nga nahimutang sa kabukiran.
Si Konsehal Jerry Guardo, chairman sa committee on communication and other utilities, kinsa maoy gitahasan ni Mayor Tomas Osmeña sa maong proyekto nihulagway nga positibo ang tubag sa network.
“Upon the order of the mayor, akong gipatawag ang mga representatives sa cell sites particularly ang globe, smart and sun to give us an update labi na sa atong mga mountain barangays kabahin sa ilang signal,” matod ni Guardo.
Gipadayag sa konsehal personal nga nasinati sa mayor ang kakuwang ug kahinay sa cellphone signal sa ubang mga barangay sa bukid diin maglisod sila og pagpadangat sa ilang mga komunikasyon paingon sa siyudad ug sa ubang lugar.
Ang mayor una rang nibahad ngadto sa mga network provider nga kon dili nila mapakusgan o mabutangan og signal ang mga dead spot sa bukid, dili na siya motugot nga aduna pay laing ibutang nga cell site ang Globe, Sun ug Smart diri sa kinapusoran sa siyudad.
Gipahibawo ni Guardo nga sa pagkakaron, adunay 21 ka pending application ang Smart communication ug gusto nilang masayran asa kining dapit sa dakbayan ibutang.
Ang chairman sa committee on communication and other utilities niingon nga nakadawat sab siya og mga report pinaagi sa social media nga bisan dinhi sa sentro sa siyudad, adunay hinay nga signal diin gipangitaan na usab kini og paagi sa mga network provider.
Gipasalig usab niya nga makigtambayayong ang City Government ngadto sa mga network provider aron mapadali ang ilang aplikasyon masulbad lang ang mga deadspot sa Cebu City labi na sa bukid.
Karong adlaw nga Huwebes, gikatakdang moduso og report ang mga network provider kon pila ka mga cellsites ang ilang natukod ug kadtong pending nila nga aplikasyon lakip na ang pag-ila sa mga lugar nga hinay ngadto sa walay signal. PAC