NBI mironda sa suertres sa Asturias, Tuburan; 14 ang nangasikop

KATORSE ka mga tawo ang nasikop sa operasyon nga gipahigayon sa National Bureau of Investigation batok sa illegal gambling sa lungsod sa Tuburan ug Asturias.

Ang mga dinakpan puros mga attendant sa illegal nga small town lottery operation.

Gipasabot sa officer-in-charge sa National Bureau of Investigation (NBI) 7, Atty. Dominador Cimafranca, nga gikonsiderar silang illegal human ang ilang operator nga mao ang Peryahan ng Bayan, dili awtorisado sa Phil. Charity Sweepstakes Office (PCSO).

Matod ni Cimafranca, ang lehitimong operator nga mao ang Saturn Gaming Corporation maoy nagpatabang sa NBI aron aksiyonan ang dayag nga operasyon sa illegal small town lottery nga mas menus ang presyo.

Ang presensiya sa dili awtorisado nga STL operator giingong nakapamenus sa kita sa awtorisadong operator niini ug maoy hinungdan nga dili na sila makakab-ot sa quota nga gi-set usab sa PCSO.

Niadtong Biyernes, Septiyembre 14 gilusad sa NBI ang ilang operasyon sa Tuburan ug Asturias nga niresulta sa pagkasikop sa mga illegal STL attendant.

Napasakaan na usab sila ug reklamo ngadto sa Cebu Provincial Prosecutor’s Office kagahapong adlawa.

Gisubay na sa NBI kon kinsa ang provincial coordinator sa illegal nga STL operator sa Sugbo ug ila sab unya kining isunod sa pagpasaka og kaso.

Gihulagway ni Cimafranca nga “very rampant” o naghitak ang operasyon sa illegal STL ug gani sama sa mga legal STL operator, may mga kiosk sab sila nga makita diha mismo sa kadalanan. AZLG

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph