PATAY ang pasahero sa traysikol nga gikan mitambong sa husay sa kasong “physical injury” sa Lapu-Lapu City Hall of Justice kahagapon sa buntag.
Giila ni P03 Marven Saraum, investigator sa Homicide Section, ang biktima nga si Eustaquio Gilig, 39 nga taga-Barangay Santa Rosa, Olango Island, Lapu-Lapu.
Magpahatod unta ang biktima sa Angasil wharf sa Barangay Mactan aron mosakay og pumpboat pa-uli sa isla.
Sa eskena nga bahin sa Sityo Angasil kalit mibutho ang riding-in-tandem samtang ang angkas maoy mipusil ngadto ni Gilig diha sa traysikol nga aduna usay laing mga pasahero.
Maayo nalang nga way napagan sa pagpamusil apan naglumba-anay og panglayat ang mga pasahero atol sa hitabo.
Patay diha-diha ang biktima gumikan sa multiple gunshot wounds nga gituohang gamit ang kalibre 45 base sa mga basiyo sa bala nga nahipos sa Scene of the Crime Operatives (SOCO).
Wa isalikway sa kapulisan nga posibleng dumot maoy nagpaluyo sa pagpatay ni Gilig nga may kalabutan sa kasong diin siya maoy reklamante samtang gisusi pa usab ang pagkatawo sa namatay sa posibleng kalambigitan sa illegal nga bisyo.
Samtang maguwang sa namatay nga si Allan Gilig, ambulant vendor sa area wa gilayon makamay-ong sa igsuon nga nagluko nga nagkadugo.
Sa dihang nakuha sa taga-SOCO ang identification cards sa namatay og gibutyag ang pangalan niini, nakugang ug igo nalang kini sa pagtiyabaw. FVQ