GIBARUGAN sa kampo ni Kongresista Jonas Cortes nga legal ang ilang pagbaligya sa 3.5 ektaryang luna atol sa siya pa ang mayor sa Syudad sa Mandaue niadtong 2015.
Sa gipagawas nga official statement ni Cortes pinaagi sa usa sa iyang mga staff nga si Atty. Joel Seno nga una, adunay deed of sale nga gihimo ang kagamhanan sa dakbayan sa Mandaue pabor sa E.C. Ouano Development & Management Corporation (ECODEMCOR) niadtong 2015 nga gi-base sa provision sa contract of lease sukad sa 1980.
Nag-base sila sa paghatag og kantidad sa luna sa valuation sa foreshore land ubos sa Department of Environment and Natural Resources Office (DENR) administrative order No. 99-34 kun Rules and Regulations Governing the Administration, Management and Development of Foreshore Areas, MarshyLands and Other Lands Bordering Bodies of Water.
Base sa mao nga order, ang balor sa luna matag metro kwadrado tag P50 ra.
Ang nahisgutang luna niadtong dekada 90 tubigan pa apan gigastuhan og P75 milyunes sa kompaniya aron pag-reclaim. Ang Siyudad way gigasto, pasabot ni Seno. Matod ni Seno nga base sa Local Government Code, ang nag-abang makapalit sa luna ug ang balor sa pagpalit niini kuhaan sa kinatibuk-ang nagasto sa pagpapalambo.
Gawas sa gastong P75 milyunes, ang Ecodemcor nidonar usab og P42,764, 950 milyunes nga balor sa mga karsada, dugang ni Seno.
Ang Promise to Sell nga gipetsahan og Marso 28, 2001 naglatid usab sa balor nga P50 sa matag metro kwadrado gibase sa DENR Administrative Order 99-34.
“The amount of P1, 791,050.00 is not the only consideration since Ecodemcor donated P42,764,950 worth of private road network, as additional consideration executed on the same day, which the City planned to acquire in connection with the implementation of its coastal road corridor to relieve the city center of the the traffic congestion in the vicinity of Barangay Looc and will benefit thousands of Mandauehanon,” tipik sa opisyal nga pamahayag ni Seno.
Ang maong pamahayag nigawas human gimantala sa national nga pamantalaan nga mag-atubang og mga kasong criminal nga plunder, kalapasan sa Anti-graft and Corrupt Practices Law ug administrative charges nga grave misconduct ug conduct prejudicial to the best interest of the service, tungod sa gisudlan nga kontrata sa Mandaue City government niadtong 2015 sila si Cortes ug ubang mga opisyal sa kagamhanan. Matod ni Seno, usa sa mga kawani sa chief of staff ni Cortes nga ila ra usab nabasa nga usa ka Bernard Cabatingan ug Analin Maquilan ang mopasakag kaso karong semanaha og taxpayer’s complaint ngadto sa Visayas Ombudsman. Fe Marie D. Dumaboc, Correspondent