TUNGOD sa awayan sa teritoryo sa pagpamaligya sa ginadiling drugas ug posibleng maoy responsable sa sunod-sunod nga patay sa dakbayan sa Mandaue ang napatay nga duha ka mga sakop sa Parojinog drug syndicate sa dakbayan.
Gani turf war kun ilogay sa teritoryo ang gisubay nga motibo sa Mandaue City Police Office (MCPO) sa pagpamusil-patay sa mga giingong sakop sa Parojinog drug group nga sila si Marke Lester Castillo ug Renan Mabida.
Gitug-an ni MCPO director, Senior Supt. Julian Entoma, nga gitan-aw nila karon nga lakip ang duha sa mamumuno sa sunod-sunod nga mga pagpamusil-patay sa syudad sa mga nangaging semana ug buwan, ilabi na niadtong mga nalambigit sa ginadiling drugas.
Gisubay pagbalik sa kapulisan sa dakbayan sa Mandaue ang mga insedente sa pagpamusil-patay, ilabi kay ang mga paghulagway sa mga mamumuno, susama sa body-built nila ni Castillo ug Mabida.
Ang duha nga napatay niadtong Domingo sa gabii, matud ni Entoma adunay susamang gidak-on sa lawas sa mga nakita diha sa CCTV footage ug sa gipanghulagway sa mga nakasaksi sa mga mamumuno.
“Diha mi na-alarma kay may mga description sa mga previous nga shooting incident, dunay nagsulti nga naka-motor, gipaarakan, then mga dagko nga tawo, mao na among gi-match... Can be mo-fit kanila (Castillo ug Mabida) ang description. Pareha sa kang Montebon case, ang description ato dagkong taw, among nakita ang biktima lain tong grupo,” matod ni Entoma.
Nakita nila nga nagbangi kini diha sa terotoryo sa patigayon sa illegal nga drugas, ug bangi usab sud lang sa ilang grupo.
Kini sama sa kaso sa manag-uyab nga taga dakbayan sa Sugbo nga sila si Jamie Mata ug Stephen Del Corro, lakip na ang higala nila nga si Jarren Yu Lloren, kinsa gipangdagit sa usa ka apartment sa brgy. Subangdaku ug nakit-an nalang nga natusak-tusak sa bala ang ilang mga lawas sa kalibunan sa lungsod sa Liloan ug sa Brgy. Casili sa dakbayan sa Mandaue.
Nahitabo kini niadtong ulahing bahin sa Hulyo, ning tuiga.
Gipasabot ni Entoma nga sa nakuhang’ footage sa CCTV, duha sa mga lalaking nidagit kanila, momay-ong sa gidak-on sa lawas ni Castillo ug Mabida.
Lakip usab sa gitan-aw nga posibleng may kalambigitan ang duha, sa kasong pagpatay kang Jessie Montebon ug sa live-in partner niini niadtong Agusto 6 sa Zone Ahos, Brgy. Paknaan.
Dugang ni Entoma nga susama usab ang mga gunman sa pagpatay sa nailang drug personality sa Lorega-San Miguel, Cebu City, nga si Froilan Mabaga, kinsa gipusil human pakanauga una ang angkas nga babaye, diha sa may Brgy. Paknaan niadtong Setyembre 3.
Lakip na sa ilang gitan-aw ang posibilidad nga ang duha ka Parojinog members ang nipatay sa Alilin brothers, niadtong Septiyembre 10 sa Brgy. Tabok.
Gitandi na lang nila usab karon ang mga motorsiklo nga gisakyan sa mga mamumuno sa pagpamusil, ug sa motor nga iya kang Castillo.
Gipasabot ni Entoma nga ang maong mga nahisgutang insidente sa pagpamusil-patay sa syudad, may kalambigitan sa ginadiling drugas.
“Nahibung sad gud mi, nga sunod-sunod, then ang description dagkong tawo, pati pa tong gilabay sa Liloan area, katong minor (Mata kidnap-salvage case). Among gisubay nga lain pud tong grupo. Sa karon gud kon moingon ka nga mamatay ang usa ka drug lord, daghan ang mosubol, upat ngadto sa walo ka galamay nga gustong mag-leader. Bahala’g the same group na sila, pero kon mamatay, mag-banggaay nana sila ba. A matter of territory war nana sila, magpatayan na sila,” gipasabot ni Entoma.
Gitug-an ni Entoma nga pipila sa ilang gitan-aw nga lakip sa turf war, kining mga galamay sa Sadaya drug group, kang Jaypee Rosal, Alvaro Alvaro “Baruk”, mga galamay sa napatay’ng drug lord nga si Steve Go, uban pa.