BISAN og personal pa kini nga gamiton nimo, illegal ang mopalusot og sex toys dinhi sa nasod.
Mao kini ang gipahibawo ni Erwin Andaya, administrative officer IV sa Bureau Of Customs - Cebu kinsa nihulagway nga base sa Republic Act 10863 kun Customs Law, nga prohibited good o gidili kining sex toys.
Matod ni Andaya nga base sa balaod, obscene or immoral character ang sex toys sa nasod itandi sa ubang nasod nga daghang tindahan nga naninda niini.
Matag kausa sa usa ka buwan, aduna’y madakpan ang BOC examiner sa tugpahanan nga nagdala niini.
“So, kon moagi sa atong Customs lane and subjected siya for examination sa Customs examiner unya makita jud na (sex toys), i-seize jud na nato or i-apprehend jud na nato,” matod ni Andaya.
Base sa Republic Act 10863 kun Customs Modernization and Tariff Act ubos sa Section 118, usa ka prohibited good ang sex toys hinungdan nga bisan og personal use pa, di kini pwede nga ipalusot sa nasod.
“Written or printed articles, negatives or cinematographic film, photographs, engravings, lithographs, objects, paintings, drawings, or other representation of an obscene or immoral character,” tipik sa paghulagway sa sex toys.
Usa sa nadakpan nila kaniadto nga aduna’y Pinoy nga nagdala ug giingon nga massage roll sa tugpahanan.
Apan dihang gisuta kini sa online, usa diay kini ka sex toy ug didto ila kining giembargo.
Ubos usab sa Presidential Decree 969 aduna’y penalty nga P6,000-P12,000 ang mapamatud-an nga makalapas niini.
“Those who shall sell, give away or exhibit films, prints, engravings, sculpture or literature which are offensive to morals,” nagkanayon ang mao nga balaud. HBL