DRAYBER sa traysikad gibilanggo human nag-wild ug nanion og pusil sa iyang manikyuristang asawa kay gibalibaran siya nga mag-sex sila niadtong Lunes sa alas 7:30 sa buntag sa Sitio Rattan, Barangay Tangke, dakbayan sa Talisay.
Si Bert (di tinuod nga ngan), 35, gipusasan sa mga sakop sa Talisay City Police Station human mi-reklamo ang iyang asawa nga si Jessica, nagtrabaho sa usa ka salon sa dakbayan sa Sugbo.
Ang asawa nangayog abag sa kapulisan sa kahadlok nga gitiunan siya og pusil sa iyang bana.
Si PO1 Sherlyn Repel, desk officer sa Talisay Police Station, nagkanayon gireklamo si Bert ni Jessica human gitiunag armas dihang gibalibaran sa gusto nga mag-sex silang duha.
Sa ilang pagresponde, nakuhaan og .38 kalibreng revolver si Bert. Si PO1 Elvin Dablo, imbestigador sa Talisay Police, kinsa usa sa arresting officer, nibutyag nga naaktuhan nila si Bert nga naghupot sa iyang pusil hinungdan nga ilang gidakop.
Si Jessica niingon nga nibalibad siya nga makig-sex kay gikapoy sa trabaho.
Apan kagahapon sa buntag, ang managtiayon nagkauli kay ang asawa wa na mosang-at sa kasong Violence Against Womens and Children kay gipasaylo.
Kasong paghupot lang sa armas nga way lisensiya ang ilang ipasaka karong adlawa batok sa suspek kay wa ma-inquest kagahapon sa hapon sa piskaliya kay gipaabot nila ang resulta sa pag-verify sa armas kon kini lisensyado ba.
“Lunes sa gabii nangayog pasaylo ang bana, gisaksihan sa among kauban. Unya kagahapon sa buntag nangayo na pud ni siyag pasaylo, naluoy ang asawa wala na gihinayon ang kasong VAWC,” dugang ni Dablo.
Si Bert nga nahinabi sa Sunstar Superbalita Cebu wa moangkon nga gitiunan niyag armas ang iyang asawa.
Apan giangkon niya nga nasuko siya dihang mihangyo nga mag-sex sila sanglit nagduda na siya niini pipila na ka buwan.
Nasakpan niya sa tex-text ingon man nakit-an niya nga dunay usa ka driver nga maoy magkuha ingon man mohatod niini sa pagpauli.
Mao nga ang armas nga .38 revolber iyang gition sa iyang ulo, dili sa iyang asawa.
Nagtuo siya nga nahadlok kini nga iyang pusilon kay nagtiner naman siyag armas. Ang armas giingong gibilin lang kini sa usa ka manuyupay sa kantidad nga P200 unya lukaton kini.
“Nagselos gyud ko niya , Sir, kay kada hangyo nako niya og sex mobalidad, magsigeg reklamo nga dili kay kapoy iyang lawas. Unya naglalis mi kay ako giingnan nga mosayo unta ka og pauli, dili kadlawon mao nga naa mi misunderstanding,” dugang ni Bert.